ബദിയഡുക്ക: ബൈക്ക് റോഡരികിലെ താഴ്ചയിലേക്കു മറിഞ്ഞു മൂന്നു പേര്‍ക്കു പരുക്കേറ്റു. ഗുരുതരമായി പരുക്കേറ്റ രണ്ടുപേരെ മംഗളുരുവിലെ സ്വകാര്യ ആശുപത്രിയില്‍ പ്രവേശിപ്പിച്ചു. നെല്ലിക്കട്ടക്കു സമീപം പൈക്കയിലെ സുനില്‍(22), കുമ്പള മളിയിലെ സുധീഷ് (24), മഞ്ചു (26)എന്നിവര്‍ക്കാണു പരുക്കേറ്റത്. സുനിലും സുധീഷും മംഗളുരുവിലെ ആശുപത്രിയില്‍ ചികിത്സയിലാണ്. മഞ്ചുവിനെ കാസര്‍കോട് സ്വകാര്യ ആശുപത്രയിലും പ്രവേശിപ്പിച്ചു.
കഴിഞ്ഞ ദിവസം രാത്രി ഒന്‍പതോടെ ബദിയഡുക്ക പൊലിസ് സ്റ്റേഷന് പിറക് വശത്തുള്ള പെരഡാല വളവിലാണ് അപകടം. രാത്രി വളവിനു സമീപമുള്ള കുഴി ശ്രദ്ധയില്‍പ്പെടാതെ ബൈക്ക് നിയന്ത്രണം വിട്ട് 150 അടി താഴ്ചയിലേക്ക് മറിയുകയായിരുന്നു.
ഈ വളവില്‍ അപകടം പതിവാണ്. ഒരു വര്‍ഷം മുമ്പ് ഇതേ വളവില്‍ കാര്‍ മരത്തിലിടിച്ച് ഒരാള്‍ മരിച്ചിരുന്നു.