തിരുവനന്തപുരം: ചൈനയില്‍ നടക്കുന്ന പരിപാടിയില്‍ പങ്കെടുക്കുന്നതിന് ടൂറിസം മന്ത്രി കടകംപള്ളി സുരേന്ദ്രന് യാത്രാനുമതി നിഷേധിച്ച സംഭവത്തില്‍ വിശദീകരണവുമായി വിദേശകാര്യമന്ത്രി വി.കെ സിങ്. മന്ത്രിയ്ക്ക് യാത്രാനുമതി നിഷേധിച്ചത് രാജ്യത്തിന്റെ അന്തസ്സ് കണക്കിലെടുത്താണെന്ന് വി.കെ സിങ്. തിരുവനന്തപുരത്ത് വാര്‍ത്താ സമ്മേളനത്തില്‍ പറഞ്ഞു.

അനുമതി നല്‍കാത്തത് പ്രോട്ടോകോള്‍ പ്രശ്‌നം മൂലമാണ്. ചൈനയില്‍ താഴ്ന്ന പദവിയില്‍ ഉള്ളവരുമായാണ് മന്ത്രി ചര്‍ച്ച നടത്താനിരുന്നത്. ഇത് രാജ്യത്തിന് അഭിമാനകരമല്ലെന്നും രാജ്യത്തിന് അഭിമാനമാണ് വലുതെന്നും അദ്ദേഹം പറഞ്ഞു.

ഈ മാസം 11 മുതല്‍ 16 വരെ ചൈനയില്‍ ലോക ടൂറിസം ഓര്‍ഗനൈസേഷന്‍ സംഘടിപ്പിക്കുന്ന യോഗത്തില്‍ പങ്കെടുക്കാനാണ് മന്ത്രി കടകംപള്ളി സുരേന്ദ്രന്റെ നേതൃത്വത്തിലുള്ള സംഘം പോവാനിരുന്നത്. എന്നാല്‍ കാരണം വ്യക്തമാക്കാതെ കേന്ദ്രം യാത്രാനുമതി നിഷേധിക്കുകയായിരുന്നു.

ഇതിനെതിരെ മുഖ്യമന്ത്രി പിണറായി വിജയന്‍ പ്രധാനമന്ത്രിക്ക് കത്തെഴുതിയിരുന്നു. എന്നാല്‍ അനുമതി നിഷേധിച്ചതില്‍ രാഷ്ട്രീയ ഇടപെടല്‍ ഉണ്ടായിട്ടില്ലെന്നാണ് കേന്ദ്ര സര്‍ക്കാര്‍ അറിയിച്ചത്. രാജ്യത്ത് കേരളത്തിലെ മന്ത്രിക്കു മാത്രമായിരുന്നു ഔദ്യോഗിക ക്ഷണം ഉണ്ടായിരുന്നുള്ളു.