ആലുവ: പവിത്രമായ വിദ്യാഭ്യാസ വൈജ്ഞാനിക മേഖലകളില്‍ ഉണ്ടായിക്കൊണ്ടിരിക്കുന്ന ചൂഷണങ്ങളും മൂല്യച്യുതികളുമാണ് വര്‍ത്തമാന ലോകത്തിന്റെ പ്രധാന പ്രശ്‌നമെന്ന് എസ്.കെ.എസ്.എസ്.എഫ് ട്രെന്റ് ജില്ലാ എജ്യുകോണ്‍ സംഗമം അഭിപ്രായപ്പെട്ടു. ലോകത്ത് എല്ലാ മേഖലകളിലുമുള്ള പുരോഗതി വിദ്യാഭ്യാസ മേഖലയെ അടിസ്ഥാനമാക്കിയാണ്. അതില്‍ സംഭവിക്കുന്ന ഏറ്റവും ചെറിയ മൂല്യശോഷണംപോലും സമൂഹത്തിന്റെ വികാസത്തിനെ സാരമായി ബാധിക്കും. പൂര്‍ണ അര്‍ഥത്തിലുള്ള പരിശുദ്ധി വിദ്യാഭ്യാസ മേഖലയ്ക്ക് അനിവാര്യമായതിനാല്‍ സാമൂഹിക, സാംസ്‌കാരിക, സാമ്പത്തിക തലങ്ങളിലുള്‍പ്പെടെയുള്ള ചൂഷണ മനോഭാവമുള്ളവരെ ഈ മേഖലയില്‍ നിന്നും മാറ്റി നിര്‍ത്താന്‍ സമൂഹം ആര്‍ജവം കാണിക്കണമെന്നും സംഗമം ആവശ്യപ്പെട്ടു.
എജ്യുകോണ്‍ എം.ജി യൂനിവേഴ്‌സിറ്റി മുന്‍ സിന്‍ഡിക്കേറ്റ് മെമ്പര്‍ പ്രൊഫ. സി.എച്ച് അബ്ദുള്‍ ലത്തീഫ് ഉദ്ഘാടനം ചെയ്തു. എസ്.കെ.എസ്.എസ്.എഫ് ജില്ലാ വൈസ് പ്രസിഡന്റ് സൈനുദ്ദീന്‍ വാഫി അധ്യക്ഷത വഹിച്ചു. ട്രെന്റ് സൗത്ത് സോണ്‍ കോര്‍ഡിനേറ്റര്‍ അബ്ദുസ്സമദ് മാസ്റ്റര്‍ വിഷയാവതരണം നടത്തി. എസ്.കെ.എസ്.എസ്.എഫ് ജില്ലാ ജനറല്‍ സെക്രട്ടറി പി.എം ഫൈസല്‍, എം.എം.എ ജില്ലാ ജനറല്‍ സെക്രട്ടറി സിയാദ് ചെമ്പറക്കി, കെ.എം ബഷീര്‍ ഫൈസി, ട്രെന്റ് സംസ്ഥാന സമിതിയംഗം മുഹമ്മദ് ഹസിം ആലപ്പുഴ, ജിയാദ് നെട്ടൂര്‍, സിദ്ദീഖ് കുഴിവേലിപ്പടി, സിദ്ദീഖ് മാസ്റ്റര്‍, മുട്ടം അബ്ദുള്ള തുടങ്ങിയവര്‍ പ്രസംഗിച്ചു. അസ്‌ലം മണക്കാടന്‍ സ്വാഗതവും സിദ്ദീഖ് മാസ്റ്റര്‍ നന്ദിയും പറഞ്ഞു. ജില്ലയിലെ വിദ്യാഭ്യാസ മേഖലയില്‍ പ്രവര്‍ത്തിക്കുന്ന പ്രമുഖ വ്യക്തിത്വങ്ങള്‍ എജ്യുകോണില്‍ പങ്കെടുത്തു.