കണ്ണൂര്‍: ശ്രീകൃഷ്ണ ജയന്തി ദിനത്തില്‍ ആര്‍.എസ്.എസിന്റെ നേതൃത്വത്തില്‍ പദയാത്ര നടന്നത് 97 കേന്ദ്രങ്ങളില്‍ മാത്രമാണെന്ന് സി.പി.എം ജില്ലാ സെക്രട്ടറി പി. ജയരാജന്‍. ഇവയില്‍ ജനപങ്കാളിത്തം കുറവായിരുന്നു. 300 കേന്ദ്രങ്ങളില്‍ പദയാത്രകള്‍ നടത്തിയെന്നാണ് ആര്‍.എസ്.എസും ബാലഗോകുലവും പറയുന്നത്. എന്നാല്‍ എത്ര സ്ഥലത്താണ് പൊലിസിന്റെ അനുമതിക്കായി അപേക്ഷ നല്‍കിയതെന്ന് ആര്‍ക്കും പരിശോധിക്കാവുന്നതാണെന്നും അദ്ദേഹം പറഞ്ഞു. വിശ്വാസികളെ രംഗത്തിറക്കാന്‍ ആര്‍.എസ്.എസ് നടത്തിയ പ്രചാരങ്ങളുടെ പൊള്ളത്തരം സി.പി.എം തുറന്നുകാട്ടിയതിനാലാണ് പദയാത്രകള്‍ പരാജയപ്പെട്ടത്. സാംസ്‌കാരിക പ്രസ്ഥാനങ്ങളുടെ നേതൃത്വത്തിലുള്ള ഘോഷയാത്രകളില്‍ വമ്പിച്ച പങ്കാളിത്തമാണ് ഉണ്ടായതെന്നും അദ്ദേഹം പറഞ്ഞു.