റിയോ ഡി ജനീറോ: ബോക്‌സിങില്‍ ഇന്ത്യ കുതിപ്പ് തുടരുന്നു. പുരുഷ വിഭാഗം ലൈറ്റ് വെല്‍റ്റെര്‍ വെയ്റ്റ് 64 കിലോ വിഭാഗത്തില്‍ ഇന്ത്യയുടെ മനോജ് കുമാര്‍ അട്ടിമറി വിജയമാണ് സ്വന്തമാക്കിയത്. ലണ്ടന്‍ ഒളിംപിക്‌സിലെ വെങ്കല ജേതാവ് എവല്‍ദാസ് പെട്രോസ്‌കാസിനെ ഇടിച്ചിട്ടാണ് മനോജ് കുമാര്‍ പ്രീ ക്വാര്‍ട്ടറിലേക്ക് മുന്നേറിയത്.സ്‌കോര്‍ 2-1.

ആവേശം നിറഞ്ഞ മത്സരത്തില്‍ ആക്രമിച്ചാണ് മനോജ് മത്സരിച്ചത്. ആദ്യ രണ്ട് റൗണ്ടുകളില്‍ ഇന്ത്യന്‍ താരത്തിന്റെ പഞ്ചുകള്‍ക്കു മുന്നില്‍ പെട്രോസ്‌കാസിന് അടിപതറി. മികച്ച പ്രതിരോധമൊരുക്കുന്നതില്‍ പെട്രോസ്‌കാസ് പരാജയപ്പെട്ടു. അതേസമയം ആക്രമണത്തിലേക്ക് പെട്രോസ്‌കാസ് ചുവടു മാറ്റിയതോടെ ലോങ് റേഞ്ചര്‍ കൗണ്ടറുകളിലൂടെ മറു തന്ത്രമൊരുക്കാന്‍ മനോജ് കുമാറിന് സാധിച്ചു. ക്ലോസ് റേഞ്ചില്‍ പോയിന്റുകള്‍ നേടാനുള്ള പെട്രോസ്‌കാസിന്റെ ശ്രമങ്ങള്‍ ഇന്ത്യന്‍ താരത്തിനു മുന്‍തൂക്കം നല്‍കി. ഇതോടെ ആദ്യ റൗണ്ടില്‍ മനോജിനു അനുകൂലമായി ജഡ്ജുമാര്‍ വിധിയെഴുതി.

രണ്ടാം റൗണ്ടില്‍ സൂക്ഷ്മതയോടെയാണ് മനോജ് മത്സരിച്ചത്. വേഗമേറിയ സ്മാഷുകള്‍ക്ക് പകരം കൃത്യമായ പഞ്ചുകള്‍ കൊണ്ട് എതിരാളിയെ സമ്മര്‍ദ്ദത്തിലാക്കാന്‍ മനോജ് കുമാറിന് സാധിച്ചു. എന്നാല്‍ ആക്രമത്തിലൂന്നി മത്സരിച്ച പെട്രോസ്‌കാസിന് മികച്ച പ്രതിരോധമൊരുക്കാന്‍ സാധിച്ചില്ല. അവസാന റൗണ്ടില്‍ ഇരുവരും ഇഞ്ചോടിഞ്ച് പോരാട്ടമാണ് പുറത്തെടുത്തത്. മനോജ് നേരത്തെയുള്ള തന്ത്രങ്ങള്‍ തന്നെ പുറത്തെടുത്തപ്പോള്‍ ആയാസപ്പെട്ടാണ് പെട്രോസ്‌കാസ് സെറ്റ് സ്വന്തമാക്കിയത്. എന്നാല്‍ മത്സരത്തില്‍ പുലര്‍ത്തിയ ആധിപത്യം മനോജിനെ ജേതാവാക്കുകയായിരുന്നു. അടുത്ത മത്സരത്തില്‍ ഉസ്‌ബെക്കിസ്ഥാന്റെ അഞ്ചാം സീഡ് താരം ഫാസിലിദ്ദീന്‍ ഗെയ്ബ്‌നാസരോവാണ് മനോജിന് എതിരാളി.