കൊടുങ്ങല്ലൂര്‍: കാറ്റില്‍ മരം വീണ് മൂന്ന് വീടുകള്‍ക്ക് കേടുപാട് സംഭവിച്ചു. അഴീക്കോട് ഫിഷറീസ് കോമ്പൗണ്ടില്‍ കൂറ്റന്‍ മരം കടപുഴകി വീണ് രണ്ട് വീടുകള്‍ക്ക് കേടുപാട് പറ്റി. മസ്താന്‍ പറമ്പില്‍ അബ്ദുള്‍ റഹിം, മകന്‍ ഗോയല്‍ എന്നിവരുടെ വീടുകളുടെ മേല്‍ക്കൂരയിലെ ഷീറ്റ്, ജനല്‍ എന്നിവ തകര്‍ന്നു. സ്‌ക്കൂള്‍ വിട്ട് നിരവധി വിദ്യാര്‍ഥികള്‍ ഇതുവഴി പോകുന്നതിനിടയിലാണ് മരം കടപുഴകി വീണത്. ഫിഷറീസ് വകുപ്പിന്റെ ഉടമസ്ഥതയിലുള്ള പഴയ കെട്ടിടത്തിനോട് ചേര്‍ന്നു നിന്നിരുന്ന മരം വെട്ടിമാറ്റണമെന്ന് പരിസരവാസികള്‍ ഏറെ നാളായി ആവശ്യപ്പെട്ടു വന്നിരുന്നെങ്കിലും അധികൃതര്‍ നടപടിയെടുത്തില്ലെന്ന് പരാതിയുണ്ട്. മേത്തല പറമ്പിക്കുളങ്ങരയില്‍ വീടിനു മുകളില്‍ തെങ്ങ് വീണു. വെട്ടിക്കാട്ടില്‍ സുരേഷിന്റെ വീടിനു മുകളിലാണ് തെങ്ങ് വീണത്. വൈകീട്ട് അഞ്ച് മണിയോടെ വീശിയ ശക്തമായ കാറ്റിലാണ് മരങ്ങള്‍ വീണത്.