കൊട്ടിയം: ഇരവിപുരംഭാഗത്ത് ദുര്‍ഗന്ധവുമായി തീരത്തടിഞ്ഞ തിമിംഗലത്തിന്റെ ജഡം കോര്‍പ്പറേഷന്‍ ആരോഗ്യ വിഭാഗം ഉദ്യോഗസ്ഥരുടെ മേല്‍നോട്ടത്തില്‍ മറവ് ചെയ്തു.
ഇക്കഴിഞ്ഞ ശനിയാഴ്ചയാണ് ഇരവിപുരം പള്ളിനേര് ഭാഗത്ത് തിമിംഗലത്തിന്റെ ജഡം അടിഞ്ഞുകയറിയത്.അടുത്ത ദിവസം ശക്തമായ തിരമാലകളില്‍പ്പെട്ട് കടലിലേക്ക് ഒഴുകി പോയ ജഡം ഇന്നലെരാവിലെ മുണ്ടക്കല്‍ കളീക്കല്‍ കടപ്പുറത്ത് അടിഞ്ഞുകിടക്കുന്ന കപ്പലിന് സമീപം കരയിലേക്ക് അടിച്ചു കയറുകയായിരുന്നു.
കടുത്ത ദുര്‍ഗന്ധം വമിച്ചതിനെ തുടര്‍ന്ന് കോര്‍പ്പറേഷന്‍ കൗണ്‍സിലര്‍ ഗിരിജാ സുന്ദരന്‍, സി.പി.എം നേതാവ് കൊച്ചുണി എന്നിവര്‍ കോര്‍പ്പറേഷന്‍ അധികൃതരെ വിവരം അറിയിച്ചു.
തുടര്‍ന്ന് ഹെല്‍ത്ത് ഇന്‍സ്‌പെക്ടര്‍ സുധാകുമാരി, ജെ.എച്ച്.ഐമാരായ രേഖ, കോശി, എന്നിവര്‍ സ്ഥലത്തെത്തി ശുചീകരണ തൊഴിലാളികളടെ സഹായത്തോടെ മണ്ണുമാന്തിയന്ത്രം ഉപയോഗിച്ച് തിമിംഗലത്തിന്റെ ജഡം കുഴിച്ചുമൂടുകയായിരുന്നു.