കൊണ്ടോട്ടി: നെടിയിരുപ്പ് ചെരുപ്പടി മലയില്‍ സുരക്ഷാ ഭിത്തി നിര്‍മിക്കാന്‍ നഗരസഭ, റവന്യൂ ഉദ്യോഗസ്ഥര്‍, ഭൂവുടമകള്‍ എന്നിവരുടെ സാന്നിധ്യത്തില്‍ ചേര്‍ന്ന യോഗത്തില്‍ തീരുമാനിച്ചു. മേഖലയില്‍ അപകടങ്ങള്‍ പതിവായതോടെയാണിത്. മലയുടെ മുകള്‍ഭാഗത്തുനിന്നു താഴേക്കു വീണുണ്ടാകുന്ന അപകടങ്ങള്‍ ഇല്ലാതാക്കാന്‍ സംരക്ഷണ ഭിത്തി നിര്‍മിക്കും.
താഴെ ഭാഗത്തുനിന്നു ക്വാറിയിലേക്കു സ്വകാര്യ വ്യക്തികളുടെ സ്ഥലങ്ങളില്‍നിന്നുള്ള പ്രവേശനവും തടയും.
കഴിഞ്ഞ ഞായറാഴ്ച കോട്ടക്കല്‍ പറമ്പിലങ്ങാടി ആയാപറമ്പില്‍ ബൈജുവിന്റെ മകന്‍ സായൂജ് (11) പാറമടയിലേക്കു വീണു വെള്ളത്തില്‍ മുങ്ങി മരിച്ചിരുന്നു. പ്രദേശം റവന്യൂ, നഗരസഭാ ഉദ്യോഗസ്ഥര്‍ പരിശോധിച്ചു.