തൊടുപുഴ: ഒളമറ്റം ഐ.എച്ച്.ആര്‍.ഡി കോളജില്‍ രണ്ട് ദിവസമായി സംഘര്‍ഷം. കമ്പ്യൂട്ടര്‍ മൂന്നാം വര്‍ഷ വിദ്യാര്‍ഥികളും ബി.കോം രണ്ടാം വര്‍ഷ വിദ്യാര്‍ഥികളും തമ്മിലാണ്  സംഘര്‍ഷം നടന്നത്. കമ്പ്യൂട്ടര്‍ മൂന്നാം വര്‍ഷ വിദ്യാര്‍ഥി എമിലും ബി.കോം രണ്ടാം വര്‍ഷ വിദ്യാര്‍ഥി ടോണിയും തമ്മിലുണ്ടായ വാക്കേറ്റം കൈയ്യാങ്കളയില്‍ കലാശിക്കുകയായിരുന്നു. തുടര്‍ന്ന് ഇരു ബാച്ചുകളിലെയും വിദ്യാര്‍ഥികള്‍ തമ്മില്‍ ക്യാമ്പസില്‍ ഏറ്റുമുട്ടുകയായിരുന്നു. സംഘര്‍ഷത്തിന് ശേഷം ഇരുകൂട്ടരും  ഒത്തുതീര്‍പ്പ് ധാരണയാകുകയും ചെയ്തിരുന്നു.എന്നാല്‍ കൂടുതല്‍ മര്‍ദ്ദനം ഏല്‍ക്കേണ്ടി വന്ന ബി.കോം രണ്ടാം വര്‍ഷ വിദ്യാര്‍ഥി ടോണിയുടെ അമ്പതോളം വരുന്ന കുടുംബക്കാര്‍ ഇന്നലെ ക്യാമ്പസ്  പരിസരത്ത് എത്തുകയും സംഘര്‍ഷ സാധ്യത ഉടലെടുക്കുകയും ചെയ്തു. തുടര്‍ന്ന് നാട്ടുകാര്‍ വിളിച്ചറിടിച്ചത് പ്രകാരം തൊടുപുഴ പൊലിസ് സ്ഥലത്ത് എത്തി സ്ഥിതിഗതികള്‍ ശാന്തമാക്കുകയായിരുന്നു.