തൊടുപുഴ: രണ്ടരക്കിലോ കഞ്ചാവുമായി ആറംഗ സംഘം പിടിയിലായി. തൃശൂര്‍ സ്വദേശികളായ നിഷാന്ത് ഗോപി (30), സതീഷ് കുമാര്‍ (37), ജിതിന്‍ ലാല്‍ (23), ബിജു എബ്രാഹം (35), മുണ്ടക്കയം സ്വദേശികളായ കിരണ്‍ രാമന്‍കുട്ടി (26), അഖില്‍ (23) എന്നിവരെയാണ് പീരുമേട് എക്‌സൈസ് ഇന്‍സ്‌പെപെക്ടറും സംഘവും പിടികൂടിയത്.
ഇന്നലെ രാവിലെ ദേശിയ പാത 183ല്‍ പീരുമേട് പൈന്‍കാടിന് സമീപം എക്‌സൈസ് സംഘം നടത്തിയ വാഹന പരിശോധനയിലാണ് വാഹനത്തിനുള്ളില്‍ ഒളിപ്പിച്ചു കടത്താന്‍ ശ്രമിച്ച കഞ്ചാവ് കണ്ടെത്തിയത്.വാഹനത്തിനുള്ളില്‍ രഹസ്യ അറയിലാണ് സൂക്ഷിച്ചിരുന്നത്. എക്‌സൈസിനു ലഭിച്ച രഹസ്യവിവരത്തെ തുടര്‍ന്നായിരുന്ന് ദേശിയ പാതയില്‍ വാഹന പരിശോധന നടത്തിയത്. പ്രതികള്‍ സഞ്ചരിച്ച വാഹനത്തില്‍ സ്ഥിരമായി കഞ്ചാവ് കടത്തിയിരുന്നതായി എക്‌സൈസ് സംഘത്തിന് സുചന ലഭിച്ചിരുന്നു.
ഇവര്‍ ഉപയോഗിച്ചിരുന്ന വാനും പിടിച്ചെടുത്തിട്ടുണ്ട്. തമിഴ്‌നാട്ടിലെ കമ്പത്തു നിന്നുമാണ് കഞ്ചാവ് വാങ്ങിയതെന്നും ഇവ തൃശൂരിലേയ്ക്ക് കൊണ്ടുപോയി വില്‍പ്പന നടത്തുന്നതിനു വേണ്ടിയാണെന്നാണ് പിടിയിലായവര്‍ നല്‍കിയ മൊഴി. പിടിയിലായവര്‍ കഞ്ചാവ് മൊത്തവില്പ്പന വ്യാപാരികളാണന്നും നിരവധി ക്രിമിനല്‍ കേസുകളില്‍ പ്രതികളാണന്നും എക്‌സൈസ് സംഘം പറഞ്ഞു.