ഏലപ്പാറ: കാട്ടുപന്നി വീടിനുള്ളില്‍ കയറി നടത്തിയ ആക്രമണത്തില്‍ രണ്ടുപേര്‍ക്ക് പരുക്കേറ്റു. ചപ്പാത്ത് ശാന്തിപ്പാലം ആര്‍. വാസു(75), ബന്ധു എക്കാട്ടില്‍ ഉണ്ണിക്കുഞ്ഞ്(60) എന്നിവര്‍ക്കാണ് പരുക്കേറ്റത്. ഇന്നലെ രാവിലെ ഒന്‍പതോടെയാണ് സംഭവം.
വീട്ടിലെ ഡയനിംഗ് റൂമിലിരുന്നു ഭക്ഷണം കഴിക്കുമ്പോഴാണ് അപ്രതീക്ഷിതമായി കാട്ടുപന്നി വീടിനുള്ളല്‍ കടന്നത്. വീടിനുള്ളില്‍ കടന്നയുടനെ ഭക്ഷണം കഴിച്ചുകൊണ്ടിരുന്ന വാസുവിനെ ഇടിച്ചു നിലത്തിടുകയായിരുന്നു. ശബ്ദംകേട്ട് അടുക്കളയില്‍നിന്ന് ഓടിയെത്തിയ ഭാര്യ രാജമ്മയുടെ നിലവിളികേട്ടെത്തിയ ഉണ്ണിക്കുഞ്ഞ് വാസുവിനെ രക്ഷിക്കാന്‍ ശ്രമിക്കുമ്പോഴാണ് പന്നിയുടെ ആക്രമണത്തിനിരയായത്.  പരുക്കേറ്റ ഇരുവരും ആലടി സര്‍ക്കര്‍ ആശുപത്രിയില്‍ ചികിത്സയിലാണ്.