ആനക്കര: ഇരു പഞ്ചായത്തുകളും കൈവിട്ട് റോഡിലെ കുഴികള്‍ അടച്ച് നാട്ടുകാര്‍ പ്രതിഷേധമറിയിച്ചു. പറക്കുളം ചേക്കോട് റോഡിലെ വലിയ കുഴികളാണ് നാട്ടുകാര്‍ പിരിവെടുത്ത് ക്വാറി വേസ്റ്റ് ഉപയോഗിച്ച് നികത്തി ഗതാഗതയോഗ്യമാക്കിയത്. വര്‍ഷങ്ങളായി തകര്‍ന്നു കിടക്കുന്ന ഈ റോഡ് വഴിയുളള യാത്ര ദിസഹമായ സാഹചര്യത്തിലാണ് നാട്ടുകാര്‍ മുന്നോട്ട് വന്നത്.
ആനക്കര, കപ്പൂര്‍ പഞ്ചായത്തില്‍പ്പെട്ട റോഡിലെ ആനക്കര പഞ്ചായത്തില്‍പ്പെട്ട ഭാഗത്താണ് കൂടുതല്‍ തകര്‍ച്ച നേരിടുന്നത്. റോഡിലെ വലിയ കുഴികള്‍ ഇരുചക്രവാഹനക്കാര്‍ അപകടത്തില്‍പെടുന്നതിന് കാരണമായിരുന്നു. ഇതിന് പുറമെ റോഡിനിരുവശവും വളര്‍ന്ന് നില്‍ക്കുന്ന പുല്ലും വാഹനങ്ങള്‍ക്ക് സൈഡ് കൊടുക്കുന്നതിന് ബുദ്ധിമുട്ടായിരുന്നു ഇതും നാട്ടുകാര്‍ ചേര്‍ന്ന് വെട്ടി ഒഴുവാക്കി. കെ.പി നൗഫല്‍, ഇ.പി മുസ്തഫ, കെ.പി കുഞ്ഞുമോന്‍, ബഷീര്‍, സി. സുരേഷ്, സി.കെ ശശി പച്ചാട്ടിരി, ചിരട്ടകുന്ന് സുബ്രഹ്മണ്യന്‍ നേതൃത്വം നല്‍കി.