വെഞ്ഞാറമൂട്: യുവതിയെ വീട്ടില്‍ക്കയറി ആക്രമിച്ച കേസില്‍ സഹോദരന്മാര്‍ അറസ്റ്റില്‍. ആക്രമണത്തിനിരയായ യുവതിയുടെ സഹോദരന്മാരായ കല്ലറ സ്വദേശികള്‍ വഹാബ് (57), നജീം (40) എന്നിവരാണ് അറസ്റ്റിലായത്. മണലിമുക്ക് എസ്.ഡി നിവാസില്‍ ഷാനിയയാണ് ആക്രമണത്തിന് ഇരയായത്. കഴിഞ്ഞദിവസം വൈകിട്ട് ആറിനായിരുന്നു സംഭവം. അറസ്റ്റിലായവര്‍ യുവതിയുടെ വീട്ടിലെത്തുകയും സംസാരിച്ചുകൊണ്ടിരിക്കെ വാക്കുതര്‍ക്കമുണ്ടാകുകയും മര്‍ദനത്തില്‍ കലാശിക്കുകയുമായിരുന്നു. യുവതിയുടെ മൂത്തമകള്‍ അറിയിച്ചതിനെ തുടര്‍ന്ന് വെഞ്ഞാറമൂട്ടിലുള്ള ഇവരുടെ ബന്ധുക്കള്‍ എത്തി ആക്രമണത്തില്‍ നിന്നു യുവതിയെ രക്ഷിക്കുകയും സഹോദരന്മാരെ പിടികൂടുകയുമായിരുന്നു. വെഞ്ഞാറമൂട് പൊലിസ് ഇരുവരെയും കസ്റ്റഡിയിലെടുത്തു കോടതിയില്‍ ഹാജരാക്കുകയായിരുന്നു.