കോട്ടയം: കോട്ടയം ഭാരത് ആശുപത്രിയില്‍ സമരം നടത്തിയ നഴ്‌സുമാരെ പൊലിസ് അറസ്റ്റു ചെയ്തു. അന്യായമായി പിരിച്ചുവിട്ട നഴ്‌സുമാരെ തിരിച്ചെടുക്കണമെന്നാവശ്യപ്പെട്ട് സമരം നടത്തിയ നഴ്‌സുമാരെയാണ് അറസ്റ്റു ചെയ്തത്. പൊലിസ് ഇവരെ അറസ്റ്റ് ചെയ്യാന്‍ ആരംഭിച്ചതോടെ പൊലിസും പ്രതിഷേധക്കാരും തമ്മില്‍ സംഘര്‍ഷമുണ്ടായി.

കഴിഞ്ഞ 40 ദിവസമായി ഇവിടെ നഴ്‌സുമാരുടെ സമരം തുടരുകയാണ്. അഞ്ച് നഴ്‌സുമാരെയാണ് മാനേജ്‌മെന്റ് അകാരണമായി പിരിച്ചുവിട്ടത്. ഇവരെ തിരിച്ചെടുക്കണമെന്നാവശ്യപ്പെട്ട് യു.എന്‍.എയുടെ ആഭിമുഖ്യത്തിലായിരുന്നു സമരം.

ഇന്ന് ആശുപത്രിയുടെ മുഖ്യ കവാടം ഉപരോധിച്ചതോടെയാണ് പൊലിസെത്തി പ്രതിഷേധക്കാരെ നീക്കിയത്. 18ഓളം നഴ്‌സുമാരെ പൊലിസ് അറസ്റ്റു ചെയ്തു നീക്കി. സംഘര്‍ഷത്തില്‍ പരുക്കേറ്റ ആറു നഴ്‌സുമാരെ കോട്ടയം ജില്ലാ ആശുപത്രിയില്‍ പ്രവേശിപ്പിച്ചു.