ലണ്ടന്‍: യുവേഫ യൂറോപ്പ ലീഗ് പോരാട്ടത്തില്‍ ആഴ്‌സണല്‍, എ.സി മിലാന്‍, നീസ്, ലാസിയോ ടീമുകള്‍ക്ക് വിജയത്തുടക്കം. അതേസമയം കരുത്തരായ എവര്‍ട്ടനെ ആദ്യ പോരാട്ടത്തില്‍ തന്നെ അറ്റ്‌ലാന്റ അട്ടിമറിച്ചു.
ആഴ്‌സണല്‍ ഒന്നിനെതിരേ മൂന്ന് ഗോളുകള്‍ക്ക് ജര്‍മന്‍ ക്ലബ് കൊളോണിനെയാണ് വീഴ്ത്തിയത്. എ.സി മിലാന്‍ 5-1ന് ആസ്ട്രിയ വിയനിനെ പരാജയപ്പെടുത്തി. നീസ് ഇതേ സ്‌കോറിന് സുല്‍റ്റെ വരെജെമിനെ കീഴടക്കി. ലാസിയോ 3-2ന് വിറ്റെസ്സെയേയും സെനിത് 5-0ത്തിന് വെര്‍ഡറിനേയും റയല്‍ സോസിഡാഡ് 4-0ത്തിന് റോസന്‍ബര്‍ഗിനേയും വീഴ്ത്തി. വിയ്യാറല്‍ 3-1ന് അസ്റ്റാനയെ പരാജയപ്പെടുത്തിയപ്പോള്‍ ഹോഫെന്‍ഹെയിമിനെ അവരുടെ തട്ടകത്തില്‍ സ്‌പോര്‍ടിങ് ബ്രഗ അട്ടിമറിച്ചു. ഹെര്‍ത- അത്‌ലറ്റിക്ക് ബില്‍ബാവോ പോരാട്ടം ഗോള്‍രഹിത സമനില.
കൊലാസിനക്ക്, അലക്‌സിസ് സാഞ്ചസ്, ബെല്ലെറിന്‍ എന്നിവരുടെ ഗോളുകളാണ് ആഴ്‌സണലിന് വിജയം സമ്മാനിച്ചത്. സ്വന്തം തട്ടകത്തില്‍ അരങ്ങേറിയ പോരാട്ടത്തില്‍ ആദ്യ പകുതിയില്‍ ഒരു ഗോളിന് പിന്നില്‍ നിന്ന ശേഷമാണ് ആഴ്‌സണല്‍ രണ്ടാം പകുതിയില്‍ മൂന്ന് ഗോള്‍ മടക്കി വിജയം പിടിച്ചത്. കളിയുടെ ഒന്‍പതാം മിനുട്ടില്‍ കോര്‍ഡോബയുടെ ഗോളില്‍ കൊളോണ്‍ മുന്നിലെത്തുകയായിരുന്നു.
ആന്ദ്രെ സില്‍വ നേടിയ ഹാട്രിക്ക് ഗോളുകളാണ് എ.സി മിലാന് വിജയമൊരുക്കിയത്. ഏഴാം മിനുട്ടില്‍ ഹകന്‍ ചലനോഗ്ലുവാണ് മിലാന് ആദ്യ ഗോള്‍ സമ്മാനിച്ചത്. ആദ്യ പകുതിയില്‍ മൂന്നും രണ്ടാം പകുതിയില്‍ രണ്ടും ഗോളുകളാണ് മിലാന്‍ ആസ്ട്രിയ വിയനയുടെ വലയില്‍ നിക്ഷേപിച്ചത്.
അലസ്സനെ പ്ലിയയുടെ ഇരട്ട ഗോളുകളും ബെലോട്ടെല്ലി, ഡാന്റെ, സയ്ന്റ് മാക്‌സിമിന്‍ എന്നിവരുടെ ഗോളുകളുമാണ് നീസിന് വിജയമൊരുക്കിയത്.