മേപ്പാടി: വിത്ത്കാട് വൈദ്യുതി ലൈനിനു മുകളില്‍ വീണ മരം മുറിച്ചു നീക്കാന്‍ നടപടിയില്ല.
നിരവധി പേര്‍ ആശ്രയിക്കുന്ന റോഡരികിലാണ് അപകടകരമായ രീതിയില്‍ വൈദ്യുതി ലൈനിന് മുകളിലേക്ക് മരം വീണ് ചാഞ്ഞ് നില്‍ക്കുന്നത്. മരം ലൈനില്‍ തട്ടി നില്‍ക്കുന്നതിനാല്‍ പരിസരങ്ങളില്‍ വൈദ്യുതി പ്രവഹിക്കുന്നുണ്ട്. മരം വെട്ടി മാറ്റണമെന്ന് ആവശ്യപ്പെട്ട് ഒരു മാസത്തിനിടയില്‍ നിരവധി തവണ അധികൃതരെ സമീപിച്ചിരിരുന്നു. എന്നാല്‍ നടപടിയൊന്നും ഉണ്ടായില്ലെന്ന് നാട്ടുകാര്‍ പറയുന്നു. മരം വെട്ടി മാറ്റാന്‍ അധികൃതര്‍ തയ്യാറായാല്‍ നാട്ടുകാരും സഹകരിക്കാമെന്ന് അധികൃതരെ അറിയിച്ചിരുന്നു.
എന്നാല്‍ നിരവധി തവണ പരാതി നല്‍കിയപ്പോഴും ആളില്ലെന്ന് പറഞ്ഞ് അധികൃതര്‍ ഒഴിഞ്ഞ് മാറുകയായിരുന്നു. പ്രദേശത്ത് നിരവധി പോസ്റ്റുകളും മണ്ണ് ഇടിഞ്ഞ് അപകടാവസ്ഥയിലായിട്ടുണ്ട്. രൂക്ഷമായ വോള്‍ട്ടേജ് പ്രശ്‌നവും പ്രദേശവാസികളെ ദുരിതത്തിലാക്കുന്നു. ലൈനില്‍ തട്ടി നില്‍ക്കുന്ന മരത്തിലൂടെ വൈദ്യുതി പ്രവഹിക്കുന്നതിനാല്‍ വലിയ ഭീതിയിലാണ് നാട്ടുകാര്‍.
എത്രയം പെട്ടന്ന് അധികൃതര്‍ നടപടി എടുത്തില്ലെങ്കില്‍ വലിയ അപകടം സംഭവിക്കാന്‍ സാദ്യതയുണ്ടെന്ന് നാട്ടുകാര്‍ മുന്നറിയിപ്പ് നല്‍കി.