കല്‍പ്പറ്റ: പഞ്ചലോഹമെന്ന് പറഞ്ഞ് വലപിരിശംഖും കിണ്ടിയും നല്‍കി തട്ടിപ്പിനൊരുങ്ങിയ സംഘത്തെ പൊലീസ് പിടികൂടി. തോല്‍പ്പെട്ടി അരണപ്പാറ ബുഷറ മന്‍സിലില്‍ യഹിയ(45), അരണപ്പാറ മാനാട്ടില്‍ സജീര്‍(37) എന്നിവരെയാണ് കല്‍പ്പറ്റ എസ്.ഐ എ.യു ജയപ്രകാശും സംഘവും ചേര്‍ന്ന് മുട്ടിലില്‍ കച്ചവടം ഉറപ്പിക്കുന്നതിനിടെ പിടികൂടിയത്.
സുല്‍ത്താന്‍ ബത്തേരി പുത്തന്‍ക്കുടി മുസ്തഫയാണ് കബളിപ്പിക്കപ്പെട്ടത്.
മൂന്നു ദിവസം മുമ്പ് പഞ്ചലോഹമുണ്ടെന്ന്് പറഞ്ഞ് സുഹൃത്ത് മുസ്തഫയെ സമീപിച്ചിരുന്നു. തുടര്‍ന്ന് യഹിയയും സജീറുമായി മുസ്തഫ ഫോണില്‍ ബന്ധപ്പെട്ടു. തുടര്‍ന്ന് കച്ചവടം ഉറപ്പിക്കാനായി വെള്ളിയാഴ്ച ഇവര്‍ മുട്ടിലില്‍ സംഗമിക്കുകയായിരുന്നു.
വെള്ളിയാഴ്ച രാവിലെ വലംപിരിശംഖും കിണ്ടിയും മുസ്തഫയെ കാണിച്ചു.
ശംഖിന്റെയും കിണ്ടിയുടെയും പൊടി ഉരച്ചെടുത്ത ശേഷം മുസ്തഫ കല്‍പ്പറ്റയിലെത്തി പരിശോധിച്ചപ്പോഴാണ് പഞ്ചലോഹമല്ലെന്ന് വ്യക്തമായത്. തുടര്‍ന്ന് കല്‍പ്പറ്റ പൊലീസില്‍ പരാതി നല്‍കുകയായിരുന്നു.
വെള്ളിയാഴ്ച വൈകുന്നേരത്തോടെയാണ് പൊലീസ് മുട്ടിലില്‍ നിന്ന് ഇവരെ പിടികൂടിയത്. ആറു കോടി രൂപയാണ് സംഘം മുസ്തഫയോട് ആവശ്യപ്പെട്ടത്. യഹിയയെയും സജീറിനെയും ഇന്ന് കോടതിയില്‍ ഹാജരാക്കും.