നിലമ്പൂര്‍: പൂച്ചക്കുത്തില്‍ കെ.എസ്.ആര്‍.ടി.സി ബസ് അപകടത്തില്‍പ്പെട്ടു. യാത്രക്കാര്‍ രക്ഷപ്പെട്ടത് തലനാരിഴക്ക്. ഇന്നലെ രാവിലെ എട്ടേമുക്കാലോടെയാണ് ബത്തേരിയില്‍ നിന്ന് പാലക്കാട്ടേക്ക് പോവുകയായിരുന്ന കെ.എസ്.ആര്‍.ടി.സി ബസ് അപകടത്തില്‍പ്പെട്ടത്.
എതിരെ വന്ന ടിപ്പര്‍ ലോറിയെ വെട്ടിക്കുന്നതിനിടെ റോഡരികിറങ്ങി വനഭൂമിയിലേക്ക് ചരിഞ്ഞു നില്‍ക്കുകയായിരുന്നു. അമിത വേഗതയിലായിരുന്ന ടിപ്പര്‍ ലോറി ബസിനെ ഇടിക്കുന്നെന്ന് കണ്ട് വെട്ടിച്ച ഡ്രൈവറുടെ മനസാന്നിധ്യം മൂലം വന്‍ അപകടമാണ് ഒഴിവായത്.
ഒരാഴ്ചക്കിടെ മൂന്നുവാഹനാപകടങ്ങളാണ് പൂച്ചക്കുത്തില്‍ ഉണ്ടായത്. പ്രദേശത്ത് ഡിവൈഡര്‍ സ്ഥാപിക്കണമെന്ന നാട്ടുകാരുടെ ആവശ്യം അധികൃതര്‍ ചെവികൊണ്ടിട്ടില്ല.