ഭേദഗതി വരുത്തുന്നതിന് സഹകരിക്കാത്ത നിര്‍വഹണ ഉദ്യോഗസ്ഥര്‍ക്കെതിരേ നടപടി സ്വീകരിക്കുമെന്നും ജില്ലാ പഞ്ചായത്ത് പ്രസിഡന്റ് പറഞ്ഞു
ആലപ്പുഴ: വാര്‍ഷിക പദ്ധതികളിലെ ഭേദഗതിക്ക് അംഗീകാരം നേടാത്ത തദ്ദേശസ്വയംഭരണ സ്ഥാപനങ്ങള്‍ സെപ്റ്റംബര്‍ 25നകം ജില്ലാ ആസൂത്രണ സമിതിയുടെ അംഗീകാരം നേടണമെന്ന് ജില്ലാ പഞ്ചായത്ത് പ്രസിഡന്റ് ജി. വേണുഗോപാല്‍ പറഞ്ഞു.
ജില്ലാ ആസൂത്രണ സമിതി കോണ്‍ഫറന്‍സ് ഹാളില്‍ നടന്ന ജില്ലാ ആസൂത്രണ സമിതി യോഗത്തില്‍ ആധ്യക്ഷ്യം വഹിക്കുകയായിരുന്നു അദ്ദേഹം.
സെപ്റ്റംബര്‍ 25നു ശേഷം ലഭിക്കുന്ന ഭേദഗതികള്‍ അംഗീകരിക്കില്ല. 28ന് നടക്കുന്ന ജില്ലാ ആസൂത്രണ സമിതി ഭേദഗതികള്‍ക്ക് അംഗീകാരം നല്‍കും.
ഭേദഗതിക്കായി സമര്‍പ്പിക്കുന്ന പദ്ധതികള്‍ക്കൊപ്പം വ്യക്തമായ രേഖകള്‍ സമര്‍പ്പിക്കണം. ഭേദഗതി വരുത്തുന്നതിന് സഹകരിക്കാത്ത നിര്‍വഹണ ഉദ്യോഗസ്ഥര്‍ക്കെതിരേ നടപടി സ്വീകരിക്കുമെന്നും ജില്ലാ പഞ്ചായത്ത് പ്രസിഡന്റ് പറഞ്ഞു.
തൈക്കാട്ടുശേരി ബ്ലോക്ക്, പുളിങ്കുന്ന്, ചേന്നംപള്ളിപ്പുറം, പട്ടണക്കാട്, മുട്ടാര്‍ ഗ്രാമപഞ്ചായത്തുകള്‍ വാലിഡേഷന്‍ ക്രമീകരിച്ച് ഭേദഗതി സമര്‍പ്പിച്ചു. രണ്ടു നഗരസഭയും മൂന്നു ബ്ലോക്ക് പഞ്ചായത്തും ഉള്‍പ്പെടെ 22 തദ്ദേശസ്വയംഭരണ സ്ഥാപനങ്ങള്‍ ഭേദഗതി സമര്‍പ്പിച്ചിട്ടുണ്ട്. ജില്ലാ പ്ലാനിങ് ഓഫീസര്‍ എന്‍.കെ. രാജേന്ദ്രന്‍, ജനപ്രതിനിധികള്‍, ഉദ്യോഗസ്ഥര്‍ എന്നിവര്‍ പങ്കെടുത്തു.