രാവിലെ എട്ടോടെയായിരുന്നു അപകടം. രണ്ട് കെ.എസ്.ആര്‍.ടി.സി ബസുകളും രണ്ട് ടെമ്പോ ട്രാവലറുകളും ഒരു കാറുമാണ് അപകടത്തില്‍പ്പെട്ടത്. നെല്ലായി സര്‍വിസ് റോഡില്‍നിന്നു അശ്രദ്ധമായി കയറി വന്ന കാറിനെ രക്ഷിക്കാന്‍ കെ.എസ്.ആര്‍.ടി.സി ബസ് വെട്ടി തിരിച്ചതാണ് അപകടത്തിന് കാരണം. ഇതോടെ തൊട്ടു പിറകില്‍ ഉണ്ടായിരുന്ന രണ്ട് ടെമ്പോ ട്രാവലറുകളും ഒരു കാറും പെട്ടെന്ന് ബ്രേക്കിട്ടപ്പോള്‍ ഇവക്കു പിറകില്‍ വന്നിരുന്ന കെ.എസ്.ആര്‍.ടി.സി ബസ് ട്രാവലറില്‍ ഇടിക്കുകയായിരുന്നു. ട്രാവലര്‍ അതിനു മുന്നിലുണ്ടായിരുന്ന ട്രാവലറിലും ആ വണ്ടി തൊട്ടു മുന്നില്‍ ഉണ്ടായിരുന്ന കാറിലും ഇടിച്ചു. കെ.എസ്.ആര്‍.ടി.സി ബസിടിച്ച ട്രാവലര്‍ ഭാഗികമായി തകര്‍ന്നു. ഭരണങ്ങാനത്തേക്ക് പോവുകയായിരുന്ന ഈ വണ്ടിയിലെ ഒരു പുരുഷനും ഒരു സ്ത്രീക്കും ഒരു കുട്ടിക്കും പരുക്കേറ്റു. ഇവരെ തൃശൂരില്‍ സ്വകാര്യ ആശുപത്രികളില്‍ പ്രവേശിപ്പിച്ചു. മറ്റു വണ്ടികളിലെ യാത്രക്കാര്‍ക്ക് നിസാര പരുക്കേറ്റു.