പാറശാല: ട്രെയിനില്‍ കടത്തി കൊണ്ട് വന്ന 600 ഗ്രാം കഞ്ചാവുമായി രണ്ട് യുവാക്കളെ പാറശാല റെയില്‍വേ പൊലിസ് അറസ്റ്റ് ചെയ്തു.
കൊല്ലം മയ്യനാട് ഉമയനല്ലൂര്‍ ബീമാ മന്‍സിലില്‍ നൗഫല്‍(21), കൊല്ലം മയ്യനാട് ഉമയനല്ലൂര്‍ വടക്കുംകര കാട്ടുവിള യുമയ്യ മന്‍സിലില്‍ സുഹൈല്‍(23) എന്നിവരെയാണ് പിടികൂടിയത്. ചെന്നൈയില്‍ നിന്ന് തിരുവനന്തപുരത്തേക്ക് വരികയായിരുന്ന അനന്തപുരി ട്രെയിനില്‍ നിന്നാണ് ഇവരെ പിടികൂടിയത്. കഞ്ചാവ് ദിന്ധുകലില്‍ നിന്നും കൊല്ലത്തേക്ക് കൊണ്ട് വരികയായിരുന്നു.
ട്രെയിന്‍ പാറശാല റെയില്‍വേ സ്റ്റേഷനില്‍ നിറുത്തിയപ്പോള്‍ പാറശാല റെയില്‍വേ എസ്.ഐ എ. അനില്‍കുമാറിന്റെ നേതൃത്വത്തില്‍ എ.എസ്.ഐ ഷിബുകുമാര്‍, എസ്.സി.പി.ഒ ജോയി എന്നിവര്‍ നടത്തിയ പരിശോധനയിലാണ് കഞ്ചാവ് പിടികൂടിയത്.
മയ്യനാട്, ഉമയനല്ലൂര്‍ എന്നിവിടങ്ങളിലെ വിദ്യാര്‍ഥികള്‍ക്കും തൊഴിലാളികള്‍ക്കും വില്‍ക്കാനാണ് കഞ്ചാവ് കൊണ്ടുവന്നതെന്ന് പ്രതികള്‍ പൊലിസിനോട് പറഞ്ഞു. പ്രതികളെ ഇന്നലെ കോടതിയില്‍ ഹാജരാക്കി.