കാവിനടുത്ത് ഇരുട്ടില്‍ എന്തോ കണ്ടു പേടിച്ചതായിരുന്നു അയാള്‍. ബോധം വീണപ്പോള്‍ കുറേപേര്‍ അടുത്തു നില്‍പുണ്ട്. അവര്‍ കാല്‍തൊട്ടു വന്ദിക്കുന്നു. പൂക്കളിടുന്നു. അയാള്‍ക്കൊന്നും മനസിലായില്ല. എന്തോ ആലോചിച്ചുകൊണ്ട് അയാള്‍ കണ്ണടച്ചു. അപ്പോള്‍ ചുറ്റും നിന്നവര്‍ അടക്കം പറഞ്ഞു. സ്വാമിജി ധ്യാനത്തിലാ.... നമുക്ക് പുറത്തുനില്‍ക്കാം.
പിന്നെ ഭാര്യയാണു പറഞ്ഞത്, കാവില്‍ ബോധം കെട്ടുവീണ സമയത്ത് താന്‍ എന്തൊക്കെയോ വിളിച്ചുപറഞ്ഞിരുന്നെന്ന്. അതൊക്കെ വെളിപാടുകളാണെന്നാണ് ആളുകള്‍ പറയുന്നത്.
ഇപ്പോള്‍ അയാള്‍ കുറേ ആളുകളുടെ ദൈവമാണ്. ആളൊഴിയുമ്പോള്‍ അയാള്‍ നെടുവീര്‍പ്പിടും, എന്റെ ദൈവമേ...