തിരുവനന്തപുരം: ആര്‍.സി.സിയില്‍ കാന്‍സര്‍ ചികിത്സക്കിടെ രക്തം സ്വീകരിച്ചതിനെ തുടര്‍ന്ന് ബാലികക്ക് എച്ച്.ഐ.വി ബാധിച്ച സംഭവത്തില്‍ കുട്ടിയെ വീണ്ടും പരിശോധിക്കാന്‍ നിര്‍ദേശം. സംഭവത്തെക്കുറിച്ച് അന്വേഷിക്കാന്‍ ആരോഗ്യവകുപ്പ് നിയോഗിച്ച ഡി.എം.ഒയുടെ നേതൃത്വത്തിലുള്ള വിദഗ്ധ സംഘമാണ് നിര്‍ദേശം നല്‍കിയത്. അത്യാധുനിക സൗകര്യങ്ങളുള്ളതിനാല്‍ പെണ്‍കുട്ടിയെയും രക്ഷിതാക്കളെയും ചെന്നൈയിലേക്കയച്ച് അവിടെയുള്ള റീജ്യനല്‍ ലബോറട്ടറിയില്‍ പരിശോധന നടത്തണമെന്നാണ് നിര്‍ദേശിച്ചിരിക്കുന്നത്. കുട്ടിക്ക് എപ്പോഴാണ് എച്ച്.ഐ.വി ബാധിച്ചത് എന്നത് സംബന്ധിച്ച കൃത്യമായ വിവരങ്ങള്‍ ഈ പരിശോധനയില്‍ ലഭിക്കുമെന്നാണ് വിലയിരുത്തല്‍. ഇതു സംബന്ധിച്ച അന്തിമ തീരുമാനം നാളെ ചേരുന്ന യോഗത്തില്‍ ഉണ്ടാകുമെന്നാണ് വിവരം.
അതേ സമയം ആര്‍.സി.സി മെഡിക്കല്‍ ഓഫിസര്‍ ഡോ. ബീലയുടെ നേതൃത്വത്തിലുള്ള, ആശുപത്രിയിലെ ആഭ്യന്തര അന്വേഷണ റിപ്പോര്‍ട്ട് ഇന്ന് ആര്‍.സി.സി ഡയറക്ടര്‍ക്ക് സമര്‍പ്പിക്കും. ഇതിന്റെ അടിസ്ഥാനത്തിലാകും ആര്‍.സി.സി ഡയറക്ടര്‍ ആരോഗ്യമന്ത്രിക്കും ബാലാവകാശ കമ്മിഷനും റിപ്പോര്‍ട്ട് നല്‍കുന്നത്.