കോഴിക്കോട്: പതിറ്റാണ്ടിനുശേഷം കോഴിക്കോട് ജില്ലാ ജുഡിഷ്യല്‍ എംപ്ലോയിസ് സൊസൈറ്റിയിലേക്കു നടന്ന തെരഞ്ഞെടുപ്പില്‍ പുരോഗമന മുന്നണി സ്ഥാനാര്‍ഥികള്‍ക്ക് ജയം. പതിനൊന്നില്‍ ആറു സീറ്റ് നേടി പുരോഗമന മുന്നണി സൊസൈറ്റി ഭരണം നേടി. കോടതി ജീവനക്കാരുടെ സൊസൈറ്റിയിലേക്ക് 2007നു ശേഷം ആദ്യമായാണ് തെരഞ്ഞെടുപ്പ് നടക്കുന്നത്. സീറ്റ് വിഭജനം സംബന്ധിച്ചു സമവായത്തിലെത്താന്‍ സാധിക്കാത്തതിനെ തുടര്‍ന്നാണ് തെരഞ്ഞെടുപ്പ് വേണ്ടി വന്നത്. തുടര്‍ന്ന് പുരോഗമന മുന്നണിയെന്ന പേരിലുള്ള പാനലില്‍ പതിനൊന്നു പേര്‍ മത്സരിക്കുകയായിരുന്നു.
ഈ പാനലില്‍ മത്സരിച്ച എന്‍.കെ അബ്ദുസ്സമദ്, കെ. മനോജ്കുമാര്‍, കെ.കെ വിനോദ്കുമാര്‍, എന്‍.വി ശിവരാജന്‍, കെ. ദിവ്യ, ഇ.കെ രമ്യ എന്നിവരാണ് വിജയിച്ചത്. സംരക്ഷണ സമിതിയെന്ന പേരില്‍ മത്സരിച്ച പാനലിലെ അഞ്ചു പേരും വിജയിച്ചു. ഇ.ടി ലതീഷ്‌കുമാര്‍, കെ. പ്രസാദ്, ഷൈമി, എം.കെ സുനില്‍കുമാര്‍, നിഖില്‍ എന്നിവരാണ് സംരക്ഷണ സമിതിയില്‍നിന്ന് ജയിച്ചു കയറിയത്. 2007ല്‍ തെരഞ്ഞെടുപ്പ് നടന്നപ്പോള്‍ ഔദ്യോഗിക വിഭാഗത്തില്‍നിന്ന് മാറിനിന്നു മത്സരിച്ചവരില്‍ ഒരാള്‍ക്ക് മാത്രമേ ജയിക്കാന്‍ കഴിഞ്ഞിരുന്നുള്ളൂ. ഇന്നലെ ജില്ലാ കോടതി പരിസരത്തുള്ള എം.എസ്.എസ് കോംപ്ലക്‌സിലായിരുന്നു തെരഞ്ഞെടുപ്പ്. 746 വോട്ടര്‍മാരാണ് ഉണ്ടായിരുന്നത്. വൈകിട്ടോടെ ഫലം പുറത്തുവന്നു.