കോവളം: അപകടങ്ങളില്‍ ഗുരുതരമായി പരുക്കേല്‍ക്കുന്നവര്‍ക്ക് ചികിത്സ ലഭ്യമാക്കാന്‍ വിദേശമാതൃകയില്‍ ട്രോമകെയര്‍ ശൃംഖല സംസ്ഥാനത്ത് ആരംഭിക്കാന്‍ ഐ.എം.എ ഒരുങ്ങുന്നു.
ചികിത്സ ലഭിക്കാതെ തമിഴ്‌നാട് സ്വദേശി മുരുകന്‍ മരിച്ച സംഭവത്തിന്റെ പശ്ചാത്തലത്തിലാണ് അസോസിയേഷന്റെ തീരുമാനം. മാതൃകാപദ്ധതിയെന്ന നിലയില്‍ തലസ്ഥാനത്ത് ആദ്യം നടപ്പാക്കാനാണ് ഉദ്ദേശിക്കുന്നത്. പദ്ധതി വിജയിച്ചാല്‍ മറ്റു ജില്ലകളിലേക്ക് വ്യാപിപ്പിക്കും. ആംബുലന്‍സുകള്‍, സര്‍ക്കാര്‍ ആശുപത്രികള്‍, പൊലിസ്, ഇന്‍ഷുറന്‍സ് കമ്പനികള്‍ എന്നിവയെ ഏകോപിപ്പിച്ച് കണ്‍ട്രോള്‍ റൂം ആരംഭിക്കുവാനും പദ്ധതിയുണ്ട്. ഇതു സംബന്ധിച്ച് വിദഗ്ദഡോക്ടര്‍മാര്‍, മാധ്യമ പ്രതിനിധികള്‍, പൊലിസ് എന്നിവരുമായി ഐ.എം.എ ചര്‍ച്ച നടത്തി.
ഒരാഴ്ചയ്ക്കുള്ളില്‍ കരട് രൂപം സര്‍ക്കാരിന് കൈമാറും. പദ്ധതിയുമായി ബന്ധപ്പെട്ട് അപകടമരണം നടക്കുന്ന സ്ഥലങ്ങളില്‍ അപബോധം നല്‍കുന്ന തരത്തില്‍ റോഡുകള്‍ സ്ഥാപിക്കും.
അപകടത്തില്‍പെടുന്നവരെ ഉടന്‍ എത്തിക്കുന്ന കാര്യത്തില്‍ പൊതുജനങ്ങള്‍ക്കും ആംബുലന്‍സ് ഡ്രൈവര്‍ക്കും പരിശീലനം. റോഡ്‌സുരക്ഷാ സെസ് ട്രോമകെയര്‍ സേവനങ്ങളുടെ ഫണ്ടിങിനായി ഉപയോഗിക്കുക. സ്വകാര്യ ആശുപത്രികളുടെ ഫണ്ടിങിന് കൃത്യമായ രൂപരേഖ. ഡ്രോമകെയര്‍സേവനങ്ങളുടെ കാര്യക്ഷമത ഉറപ്പാക്കാന്‍ സര്‍ക്കാരിന്റെ കീഴില്‍ കമ്മിഷന്‍.
ആശുപത്രികളിലെ സൗകര്യങ്ങള്‍ തിരിച്ചറിഞ്ഞ് അഞ്ചു തട്ടുകളിലായി തിരിച്ചിട്ടുള്ള ഫെസിലിറ്റി മാപ്പിങ് എന്നിവയാണ്ചര്‍ച്ചയില്‍ ഉയര്‍ന്നുവന്ന പ്രധാന നിര്‍ദേശങ്ങള്‍. ഐ.എം.എ മുന്‍ സംസ്ഥാന പ്രസിഡന്റ് ഡോ. ശ്രീജിത് എന്‍.കുമാര്‍, ഡോ. എന്‍. സുള്‍ഫി, ഡോ. ബി. ഇക്ബാല്‍, ഡോ.അരുള്‍രാജ്, ഡോ. ജി. വിജയകുമാര്‍, ഡോ. ശ്രീകാന്ത്, ഡോ. മുഹമ്മദ് അസീല്‍ ചര്‍ച്ചയില്‍ പങ്കെടുത്തു.