ഇസ്‌ലാമാബാദ്: ലാഹോറിലെ എന്‍.എ 120 മണ്ഡലത്തില്‍ ഇന്നലെ നടന്ന ഉപതെരഞ്ഞെടുപ്പില്‍ നവാസ് ഷരീഫിന്റെ ഭാര്യ കുല്‍സൂം നവാസിന് ജയം. 14,188 വോട്ടിന്റെ ഭൂരിപക്ഷത്തിനാണ് കുല്‍സൂം ജയിച്ചത്. പാകിസ്താന്‍ മുസ്‌ലിം ലീഗ് (പി.എം.എല്‍.എന്‍) നവാസ് പാര്‍ട്ടി പ്രതിനിധിയായാണ് ഈ 66കാരി മല്‍സരിച്ചത്.

പാക് തഹ്‌രീകെ ഇന്‍സാഫ് പാര്‍ട്ടിയുടെ ഡോ. യാസ്മീന്‍ റഷീദായിരുന്നു എതിര്‍സ്ഥാനാര്‍ഥി. ഇന്നലെ നടന്ന തെരഞ്ഞെടുപ്പില്‍ 220 പോളിങ് സ്റ്റേഷനുകളിലാണ് വോട്ടെടുപ്പ് നടന്നത്.
രാവിലെ എട്ടുമുതല്‍ ആരംഭിച്ച ഉപതെരഞ്ഞെടുപ്പില്‍ വന്‍ തിരക്കാണ് അനുഭവപ്പെട്ടത്.
വോട്ടെടുപ്പ് നടക്കുന്ന പ്രദേശങ്ങളില്‍ ശക്തമായ സുരക്ഷയാണ് സര്‍ക്കാര്‍ ഏര്‍പ്പെടുത്തിയിരിക്കുന്നത്. അനിഷ്ട സംഭവങ്ങളൊന്നും റിപ്പോര്‍ട്ട് ചെയ്തിട്ടില്ല.

321,786 വോട്ടര്‍മാരുള്ള എന്‍.എ 120 മണ്ഡലത്തില്‍ 350,000 ബാലറ്റ് പേപ്പറുകളാണ് വിതരണം നടത്തിയതെന്ന് പാക് ഇലക്ഷന്‍ കമ്മിഷന്‍ അറിയിച്ചു.