കൊച്ചി: നടിയെ ആക്രമിച്ച കേസില്‍ റിമാന്‍ഡില്‍ കഴിയുന്ന ദിലീപിന്റെ ഭാര്യ കാവ്യ മാധവന്റെ മുന്‍കൂര്‍ ജാമ്യാപേക്ഷ പരിഗണിക്കുന്നത് ഹൈക്കോടതി അടുത്ത ആഴ്ച്ചത്തേക്ക് മാറ്റി. ഹരജിയില്‍ നിലപാടറിയിക്കാന്‍ പ്രോസിക്യൂഷനോട് കോടതി നിര്‍ദ്ദേശിച്ചു.

ദിലീപിനു വേണ്ടി ഹാജരാകുന്ന അഭിഭാഷകന്‍ രാമന്‍പിള്ള തന്നെയാകും കാവ്യയ്ക്ക് വേണ്ടിയും ഹാജരാവുക.

പള്‍സര്‍ സുനിയെ കാവ്യയുടെ ഡ്രൈവറാക്കാന്‍ പൊലിസ് ശ്രമിക്കുന്നുവെന്നും കേസിലില്ലാത്ത മാഡത്തെ കൊണ്ടുവരാനാണ് പൊലിസിന്റെ ശ്രമമെന്നും ജാമ്യാപേക്ഷയില്‍ കാവ്യ പറയുന്നു.

ഭര്‍ത്താവ് ദിലീപിനെതിരായ ആരോപണങ്ങള്‍ക്ക് തെളിവ് കണ്ടെത്താന്‍ അന്വേഷണസംഘത്തിന് ഇനിയും കഴിഞ്ഞിട്ടില്ലെന്നും ദിലീപിന്റെ കുടുംബാംഗങ്ങളെയും അദ്ദേഹവുമായി അടുപ്പമുള്ളവരെയും ഭീഷണിപ്പെടുത്തി കേസില്‍ ഉള്‍പ്പെടുത്താന്‍ ശ്രമിക്കുകയാണ്.

കൊടുംകുറ്റവാളി പള്‍സര്‍ സുനിയെ കോടതിയില്‍ ഓരോ തവണ ഹാജരാക്കാന്‍ കൊണ്ടുവരുമ്പോഴും മാധ്യമങ്ങളോടു കള്ളം പറയാന്‍ പൊലിസ് അനുവദിക്കുന്നു. ഇതുവഴി തന്നെ അപമാനിക്കാനും ദ്രോഹിക്കാനുമാണ് പൊലിസ് ശ്രമിക്കുന്നതെന്നും കാവ്യ ഹരജിയില്‍ ആരോപിക്കുന്നു.

പൊലിസ് വ്യാജമായി തെളിവുണ്ടാക്കുകയാണെന്ന് സംശയിക്കുന്നു. ജീവിതത്തില്‍ ഇന്നുവരെ സുനിയെ കാണുകയോ സംസാരിക്കുകയോ ചെയ്തിട്ടില്ല. പൊലിസ് ഭീഷണിപ്പെടുത്തുകയാണെന്നും കാവ്യ മുന്‍കൂര്‍ ജാമ്യാപേക്ഷയില്‍ പറയുന്നു.

അതിനിടെ കേസില്‍ കാവ്യാ മാധവനേയും നാദിര്‍ഷായേയും ഇപ്പോള്‍ പ്രതിയാക്കേണ്ട സാഹചര്യമില്ലെന്ന് പൊലിസ് അറിയിച്ചു. ഇരുവര്‍ക്കുമെതിരെ അന്വേഷണം നടക്കുകയാണെന്നും പൊലിസ് വ്യക്തമാക്കി.