നാദാപുരം: പനിബാധിതരെ ഉള്‍ക്കൊള്ളാനാവാതെ താലൂക്ക് ആശുപത്രി തിങ്ങി നിറഞ്ഞു. ഇന്നലെ ജനറല്‍ ഓ.പിയില്‍ മാത്രം അഞ്ഞൂറിലധികം രോഗികളാണ് ചികിത്സതേടി എത്തിയത്. ഇതേ തുടര്‍ന്ന് ഒ.പി ക്ലിനിക് ആളുകളെ കൊണ്ട് നിറഞ്ഞു.
സ്‌പെഷലിസ്റ്റ് വിഭാഗമായ ഇ.എന്‍.ടി, മെഡിസിന്‍, ഡെന്റല്‍, കുട്ടികളുടെ വിഭാഗം എന്നിവിടങ്ങളിലും വന്‍ തിരക്കായിരുന്നു. രോഗികളില്‍ ഏറെപ്പേരും പനിക്കുള്ള ചികിത്സ തേടിയാണ് ഇന്നലെയും എത്തിയത്.
പനി നിയന്ത്രണാതീതമെന്ന് അധികൃതര്‍ അവകാശപ്പെടുമ്പോഴും ചികിത്സ തേടിയെത്തുന്നവരുടെ എണ്ണം ദിവസവും കൂടു കയാണ്. പകര്‍ച്ചപ്പനിയുടെ ലക്ഷണമാണ് പലരും പ്രകടിപ്പിക്കുന്നത്.
ഗുരുതരാവസ്ഥയിലുള്ള രോഗികളെ ഇവിടെ പ്രവേശിപ്പിക്കുന്നതിനാല്‍ വാര്‍ഡുകളെല്ലാം രോഗികളെകൊണ്ട് നിറഞ്ഞിരിക്കുകയാണ്. പരിസരങ്ങളിലെ സ്വകാര്യ ക്ലിനിക്കുകളിലെ കഴുത്തറപ്പന്‍ ഫീസും അനാവശ്യ പരിശോധനാ നിര്‍ദേശങ്ങളും ഒഴിവാക്കാന്‍ ആളുകള്‍ സര്‍ക്കാര്‍ സംവിധാനങ്ങളെ ആശ്രയിക്കാന്‍ തുടങ്ങിയതോടെയാണ് തിരക്ക് വര്‍ധിച്ചത്.