പേരാമ്പ്ര: ലൈഫ് ഭവന പദ്ധതിയില്‍ അര്‍ഹതപ്പെട്ട വീടില്ലാത്ത കുടുംബങ്ങള്‍ക്ക് എല്ലാവര്‍ക്കും വീട് ലഭിക്കണമെങ്കില്‍ മാനദണ്ഡങ്ങളില്‍ മാറ്റം വരുത്തണമെന്ന് ചങ്ങരോത്ത് മണ്ഡലം കോണ്‍ഗ്രസ് കമ്മിറ്റി ആവശ്യപ്പെട്ടു.
25 സെന്റ് ഭൂപരിധിയും നിലവില്‍ ജീര്‍ണിച്ച വീടുകളാണെങ്കിലും ഓടിട്ടതാണെങ്കിലും ലിസ്റ്റില്‍ നിന്ന് ഒഴിവാക്കുന്നതും ഒരു റേഷന്‍ കാര്‍ഡില്‍ ഒരു വീട് എന്ന മാനദണ്ഡവും ഒഴിവാക്കിയാല്‍ മാത്രമേ അര്‍ഹതപ്പെട്ടവര്‍ക്ക് വീട് എന്ന സങ്കല്‍പ്പം യാഥാര്‍ഥ്യമാവുകയുള്ളൂ.  
ഗ്രാമസഭകളെ നോക്കുകുത്തിയാക്കി പഞ്ചായത്ത് രാജ് സംവിധാനത്തെ അട്ടിമറിക്കുന്ന സര്‍ക്കാര്‍ നടപടി പ്രതിഷേധാര്‍ഹമാണെന്നും യോഗം കുറ്റപ്പെടുത്തി.മണ്ഡലം പ്രസിഡന്റ് ഇ.ടി സരീഷ് അധ്യക്ഷനായി.
ഡി.സി.സി ജനറല്‍ സെക്രട്ടറിമാരായ ഇ.വി രാമചന്ദ്രന്‍, കെ.കെ വിനോദന്‍, പഞ്ചായത്ത് വൈസ് പ്രസിഡന്റ്  എന്‍.പി വിജയന്‍, സൈറാബാനു, എന്‍. ചന്ദ്രന്‍, കെ.കെ അശോകന്‍, ഷൈലജ ചെറുവോട്ട്, എന്‍. ജയശീലന്‍, എന്‍.കെ മൊയ്തു. പി.ടി വിജയന്‍, സി.കെ രാഘവന്‍ പ്രസംഗിച്ചു.