ഫറോക്ക്: അഞ്ചാംപനി, റൂബെല്ലാ രോഗങ്ങള്‍ നിര്‍മാര്‍ജനം ചെയ്യുന്നതിന്റെ ഭാഗമായി ലോകാരോഗ്യ സംഘടനയുടെ നേതൃത്വത്തില്‍ നടക്കുന്ന വാക്‌സിനേഷന്‍ കാംപയിന്‍ ഫറോക്ക് നഗരസഭയില്‍ ഊര്‍ജിതമായി നടപ്പാക്കും.
രണ്ടുമാസം നീളുന്ന കാംപയിന്‍ ഒക്ടോബര്‍ രണ്ടു മുതല്‍ ആരംഭിക്കും. 10 മാസം മുതല്‍ 15വയസു വരെയുളള കുട്ടികള്‍ക്കാണ് വാക്‌സിന്‍ നല്‍കുക.
നഗരസഭയിലെ 11,200 കുട്ടികള്‍ക്ക് വാക്‌സിന്‍ നല്‍കുന്നതിനുള്ള ക്രമീകരണങ്ങള്‍ അങ്കണവാടികളിലും സ്‌കൂളുകളിലും ഏര്‍പ്പെടുത്തി. ജനങ്ങളുടെ സംശയ നിവാരണത്തിനായി പി.ടി.എ മീറ്റിങ്ങുകളും അങ്കണവാടിതല യോഗങ്ങളും ബോധവല്‍ക്കരണ ക്ലാസുകളും നടത്തും.
    ആലോചനാ യോഗം ഫറോക്ക് നഗരസഭാധ്യക്ഷ പി. റുബീന ഉദ്ഘാടനം ചെയ്തു. വൈസ്‌ചെയര്‍മാന്‍ വി. മുഹമ്മദ് ഹസ്സന്‍ അധ്യക്ഷനായി. സ്ഥിരംസമിതി അധ്യക്ഷരായ ടി. നുസ്‌റത്ത്, പി. ബല്‍ക്കീസ്, പി. ആസിഫ്, എം. ബാക്കിര്‍, എം. സുധര്‍മ്മ സംസാരിച്ചു.
താലൂക്ക് ആശുപത്രി സൂപ്രണ്ട്  ഡോ. ലാലുജോണ്‍സ് പദ്ധതി വിശദീകരിച്ചു. നോഡല്‍ ടീച്ചേഴ്‌സിനുള്ള പരിശീലനത്തില്‍ എച്ച്.ഐ.കെ മുസ്തഫ ക്ലാസെടുത്തു. ആരോഗ്യപ്രവര്‍ത്തകരായ ടി.വി രഘുനാഥ്, പി. സിജു, എം. അനീഷ്, ആന്‍സി സാമുവല്‍, പി. വത്സല സംസാരിച്ചു.