കാസര്‍കോട്: വാഹനപരിശോധനക്കിടെ വനിതാ എസ്.ഐയോട് അപമര്യാദയായി പെരുമാറിയ യുവാവിനെതിരേ പൊലിസ് കേസെടുത്തു. മൊഗ്രാല്‍ പുത്തൂരിലെ ബഷീറി(25)നെതിരേയാണു വിദ്യാനഗര്‍ പൊലിസ് കേസെടുത്തത്. ഇന്നലെ വൈകുന്നേരം നാലരയോടെ ഉളിയത്തടുക്കയില്‍ വാഹനപരിശോധന നടത്തുകയായിരുന്ന വനിതാ എസ്.എ എ.വി ഓമനയോടും ഹോംഗാര്‍ഡ് കുഞ്ഞികൃഷ്ണനോടും അപമര്യാദയായി പെരുമാറിയതിനാണു കേസ്.
രേഖകളില്ലാതെ വാഹനമോടിച്ചതിനു പിടിയിലായ ബഷീര്‍ പിഴ അടപ്പിച്ചതിനെ തുടര്‍ന്ന് എസ്.ഐയോട് അപമര്യാദയായി പെരുമാറിയ ശേഷം ഹോംഗാര്‍ഡിനെ തള്ളിമാറ്റി വാഹനമെടുത്തു കടന്നുകളയുകയായിരുന്നുവെന്നാണു കേസ്.