തൊടുപുഴ: ഒക്‌ടോബര്‍ രണ്ട് മുതല്‍ എട്ട് വരെ ആചരിക്കുന്ന വന്യജീവി വാരാഘോഷത്തോടനുബന്ധിച്ച് സ്‌കൂള്‍, കോളജ് വിദ്യാര്‍ഥികള്‍ക്കായി വിവിധ മത്സരങ്ങള്‍ സംഘടിപ്പിക്കുന്നു. ഒക്‌ടോബര്‍ 2, 3 തീയതികളില്‍ ജില്ലാതല മത്സരങ്ങളും 8ന് സംസ്ഥാനതല മത്സരങ്ങളും നടത്തും. ജില്ലാതലത്തില്‍ ഒന്നും രണ്ടും മൂന്നും സ്ഥാനങ്ങള്‍ നേടുന്നവര്‍ക്ക് യഥാക്രമം 2000, 1000, 500 രൂപവീതം ക്യാഷ് അവാര്‍ഡും സര്‍ട്ടിഫിക്കറ്റും റോളിങ് ട്രോഫിയും സമ്മാനിക്കും.
ഇടുക്കി ജില്ലാതല മത്സരങ്ങള്‍ കട്ടപ്പന ഗവ. ട്രൈബല്‍ ഹൈസ്‌കൂളില്‍ ഒക്‌ടോബര്‍ രണ്ട്, മൂന്ന് തീയതികളില്‍ നടത്തും. ഓരോ മത്സരത്തിനും ഒരു വിദ്യാഭ്യാസ സ്ഥാപനത്തില്‍ നിന്നും അധികാരികളുടെ സാക്ഷ്യപ്പെടുത്തലോടുകൂടിയെത്തുന്ന രണ്ട് പേര്‍ക്ക് വീതം പങ്കെടുക്കാം.
ക്വിസ് മത്സരത്തിന് രണ്ട്‌പേര്‍ ഉള്‍പ്പെടുന്ന ഒരു ടീമിന് ഒരു സ്ഥാപനത്തില്‍ നിന്നും ഓരോ വിഭാഗത്തിലും പങ്കെടുക്കാം. ഹയര്‍സെക്കണ്ടറി തലത്തിലുള്ള മത്സരാര്‍ഥികളെ കോളജ് വിഭാഗത്തിലാണ് ഉള്‍പ്പെടുത്തുന്നത്. ജില്ലാതല മത്സരങ്ങള്‍ക്ക് ഒക്‌ടോബര്‍ രണ്ടിന് രാവിലെ ഒന്‍പത് മുതല്‍ രജിസ്‌ട്രേഷന്‍ ആരംഭിക്കും. 9.30 മുതല്‍ 11.30വരെ പെന്‍സില്‍ ഡ്രോയിംഗ് (എല്‍.പി, യു.പി, ഹൈസ്‌കൂള്‍, കോളജ് വിഭാഗം), 11.45 മുതല്‍ 12.45വരെ ഉപന്യാസം (ഹൈസ്‌കൂള്‍, കോളജ് വിഭാഗം), ഉച്ചക്ക് 2.15 മുതല്‍ 4.15വരെ വാട്ടര്‍ കളര്‍ പെയിന്റിംഗ് (എല്‍.പി, യു.പി, ഹൈസ്‌കൂള്‍, കോളേജ് വിഭാഗം)എന്നിവയും ഒക്‌ടോബര്‍ മൂന്നിന് രാവിലെ 10 മുതല്‍ ഒന്ന് വരെ ക്വിസ് (ഹൈസ്‌കൂള്‍, കോളജ് വിഭാഗം) ഉച്ചക്ക് രണ്ട് മുതല്‍ നാല് വരെ പ്രസംഗം( ഹൈസ്‌കൂള്‍, കോളജ് വിഭാഗം) എന്നിവയും നടക്കും.
സംസ്ഥാനതല മത്സരങ്ങള്‍ക്ക് ഒക്‌ടോബര്‍ എട്ടിന് രാവിലെ 8.30 മുതല്‍ രജിസ്‌ട്രേഷന്‍ ആരംഭിക്കും. ഒന്‍പത് മുതല്‍ 11 വരെ ക്വിസ് (ഹൈസ്‌കൂള്‍ വിഭാഗം), പ്രസംഗം (കോളജ് വിഭാഗം) 11 മുതല്‍ ഒരു മണിവരെ ക്വിസ് (കോളജ് വിഭാഗം) പ്രസംഗം (ഹൈസ്‌കൂള്‍ വിഭാഗം) എന്നിവ നടക്കും. കൂടുതല്‍ വിവരങ്ങള്‍ക്ക് ഫോണ്‍ 04862 232505.