ന്യൂഡല്‍ഹി: ഫിഫ അണ്ടര്‍ 17 ലോകകപ്പിനുള്ള ഇന്ത്യന്‍ ടീമിനെ മധ്യനിര താരം അമര്‍ജിത്ത് സിങ് നയിച്ചേക്കും. ക്യാപ്റ്റനെ തെരഞ്ഞെടുക്കുന്നതിനായി നടത്തിയ തെരഞ്ഞെടുപ്പില്‍ ടീമിലെ താരങ്ങളെല്ലാം അമര്‍ജിത്തിന് അനുകൂലമായി വോട്ടുചെയ്തു. പരിശീലകന്‍ ലൂയിസ് നോര്‍ട്ടന്‍ മാറ്റോസിന്റെ സാന്നിധ്യത്തിലായിരുന്നു വോട്ടെടുപ്പ്.
ടൂര്‍ണമെന്റിനുള്ള ടീമിലുള്‍പ്പെട്ട 27 പേര്‍ ചേര്‍ന്നായിരുന്നു വോട്ടെടുപ്പ്. മൂന്നു പേരുകള്‍ നല്‍കാനാണ് പരിശീലകന്‍ ആവശ്യപ്പെട്ടത്. ഇതില്‍ 26 പേരും അമര്‍ജിത്തിന് അനുകൂലമായി വോട്ടുചെയ്തു. നേരത്തെ വിവിധ ടൂര്‍ണമെന്റില്‍ താരം ടീമിനെ നയിച്ചിട്ടുണ്ട്. ടീമിലെ മുതിര്‍ന്ന താരങ്ങളിലൊരാളുമാണ് അമര്‍ജിത്ത്. ബ്രസീല്‍ ദേശീയ ടീമിനെതിരേ ഗോള്‍ നേടിയ ഏക ഇന്ത്യന്‍ താരവും അമര്‍ജിത്താണ്. ജിതേന്ദ്ര സിങ് ടീമിന്റെ ഉപനായകനാവും.
അമര്‍ജിത്തിന്റെ ക്യാപ്റ്റന്‍ സ്ഥാനത്തേക്ക് കൊണ്ടുവരുന്നതിന് കോച്ച് മാറ്റോസിന് താല്‍പര്യമുണ്ടായിരുന്നു. എന്നാല്‍ വോട്ടെടുപ്പില്‍ മാറ്റോസ് പങ്കെടുത്തില്ല. നാലു പേരുകളാണ് നായകസ്ഥാനത്തേക്ക് തന്റെ മനസിലുണ്ടായിരുന്നതെന്ന് മാറ്റോസ് പറഞ്ഞു. തെരഞ്ഞെടുപ്പിന് മുന്‍പ് ഞാന്‍ ആഗ്രഹിച്ചിരുന്നത് ഒരു ഗോള്‍കീപ്പറെ ക്യാപ്റ്റനാക്കരുതെന്നായിരുന്നു. ഇത് താരങ്ങളോട് പറഞ്ഞിരുന്നുവെന്നും മാറ്റോസ് വ്യക്തമാക്കി.