കിഴിശ്ശേരി: കുഴിമണ്ണ ജി.എച്ച്.എസ്.എസ് പരിസരങ്ങളില്‍ പൂവാല ശല്യം രൂക്ഷമാകുന്നു.  രാവിലേയും വൈകുന്നേരങ്ങളിലും  ബൈക്കുകളിലും മറ്റുമായി സ്‌കൂള്‍ പരിസരങ്ങളിലും വിദ്യാര്‍ഥികള്‍ സഞ്ചരിക്കുന്ന പ്രധാന വഴികളിലുമാണു പൂവാലന്മാര്‍  താവളമടിക്കുന്നത്.
ബസ് സ്റ്റോപ്പുകളിലും സ്‌കൂളുകള്‍ക്കു പരിസരത്തെ കടകളിലും ഇടറോഡുകളിലുമായി  തമ്പടിക്കുന്ന സാമൂഹ്യവിരുദ്ധരുടെ സംഘമാണു പെണ്‍കുട്ടികളെ നിരന്തരം ശല്യപ്പെടുത്തുന്നത്.
ഇടറോഡുകളില്‍ വച്ചു പിന്നാലെ നടക്കുന്നതായും കമന്റുകള്‍ പറയുന്നതായും പെണ്‍കുട്ടികള്‍ പറയുന്നു. സ്‌കൂള്‍വിട്ടു മടങ്ങുന്ന  പെണ്‍കുട്ടികളോടു പോലും ആളൊഴിഞ്ഞ ഇടങ്ങളില്‍ വച്ച് ഇത്തരക്കാര്‍ അസഭ്യം പറയുന്നതായി രക്ഷിതാക്കള്‍ പരാതിപ്പെടുന്നു. പൂവാല ശല്യത്തിനു പരിഹാരം കാണാന്‍ ആവശ്യപ്പെട്ടു സ്‌കൂള്‍ അധികൃതര്‍ക്കും നിയമപാലകര്‍ക്കും പരാതി നല്‍കാനുള്ള ഒരുക്കത്തിലാണു രക്ഷിതാക്കള്‍.