മാനന്തവാടി: കണിയാരം പ്രഭാത് വായനശാലയുമായി ബന്ധപ്പെട്ട് വായനശാല സെക്രട്ടറിയും കരാറുകാരനുമായ വി.യു ജോയ് വാര്‍ത്താസമ്മേളനത്തില്‍ നല്‍കിയ വാര്‍ത്തകള്‍ അടിസ്ഥാനരഹിതവും വാസ്തവ വിരുദ്ധവുമാണെന്ന് പി.ജി വിജയന്‍ വാര്‍ത്താ സമ്മേളനത്തില്‍ അറിയിച്ചു.
വായനശാല നവീകരണ പ്രവൃത്തിയില്‍ അഴിമതി നടത്തുകയും ഫണ്ട് ലാപ്‌സാക്കുകയും, നവീകരണ കമ്മിറ്റി അംഗങ്ങളുടെ വ്യാജ ഒപ്പിടുകയും ചെയ്‌തെന്നും നിലം ടൈല്‍ ചെയ്യുന്നതിനും സീലിങ്ങിനും മറ്റ് നവീകരണ പ്രവൃത്തികള്‍ക്കുമായി മാനന്തവാടി മുനിസിപ്പാലിറ്റി അനുവദിച്ച രണ്ട് ലക്ഷം രൂപയുടെ ഫണ്ടുമായി ബന്ധപ്പെട്ടാണ് ക്രമക്കേടുകള്‍ നടത്തിയിരിക്കുന്നതെന്നും ആരോപിച്ചാണ് വായനശാല കമ്മിറ്റി പുറത്താക്കിയിരിക്കുന്നത്.
വായനശാല സെക്രട്ടറിയായ ജോയിയാണ് നഗരസഭയിലെ എന്‍ജിനീയറുമായി ബന്ധപ്പെട്ട് എസ്റ്റിമേറ്റ് എടുപ്പിച്ചത്.
വായനശാലയില്‍ എടുക്കേണ്ട ജോലികള്‍ കാണിച്ച് നല്‍കാതെ കരാറുകാരനായ ജോയ് വേറെ ലക്ഷ്യങ്ങളുമായി പ്രവര്‍ത്തിച്ചതാണ് പണം നഷ്ടപ്പെടാന്‍ കാരണമെന്നും, എസ്റ്റിമേറ്റ് പ്രാകാരമുള്ള പണികള്‍ മുഴുവന്‍ ചെയ്തു തീര്‍ത്തിട്ടുണ്ട്.
എന്നാല്‍ കമ്മിറ്റി സ്വയം ജോലി ഏറ്റെടുത്തു നടത്താന്‍ തീരുമാനിച്ചതോടുകൂടി കരാറുകാരനായ ജോയിക്കുണ്ടായ വിഷമങ്ങളാണ് ഇപ്പോള്‍ പുറത്ത് വരുന്ന വാര്‍ത്തകള്‍ക്ക് പിന്നിലെന്നും പി.ജി വിജയന്‍ വാര്‍ത്താ സമ്മേളനത്തില്‍ ആരോപിച്ചു.
വായനശാലയുടെ കമ്മിറ്റികള്‍ എല്ലാവരെയും അറിയിക്കാതെയാണ് ചേരുന്നത്. കെട്ടിട നവീകരണവുമായി ബന്ധപ്പെട്ട് എന്റെ പേരില്‍ സ്വീകരിച്ച നടപടി എന്നെ അറിയിച്ചിട്ടില്ല. കെട്ടിട നവീകരണത്തിന്റെ വരവ്‌ചെലവ് കണക്കുകള്‍ കമ്മിറ്റി ഐക്യകണ്‌ഠേന അംഗീകരിച്ചതാണ്.
അതില്‍ ആരുടെയും വ്യാജ ഒപ്പുകള്‍ ഇട്ടിട്ടില്ല. ഗുണഭോക്താക്കള്‍ എന്ന നിലയില്‍ ചെയ്ത ജോലികളുടെ പ്രതിഫലമായി കിട്ടിയ 18000 രൂപ വായനശാല കമ്മിറ്റിക്ക് നല്‍കാന്‍ തീരുമാനിച്ചതാണ്. എന്നാല്‍ സെക്രട്ടറി പണം കൈപ്പറ്റാന്‍ തയ്യാറായില്ല. അതിനാല്‍ പണം ബാങ്ക് അക്കൗണ്ടില്‍ നിക്ഷേപിക്കാന്‍ തീരുമാനിച്ചു. എന്നാല്‍ അക്കൗണ്ട് നമ്പര്‍ നല്‍കാന്‍ തയ്യാറാകാത്തതിനാല്‍ പണം നിക്ഷേപിക്കാന്‍ സാധിച്ചില്ല. ഈ വിവരം കമ്മിറ്റി തീരുമാനപ്രകാരം ജോയിയെ അറിയിച്ചതുമാണ്. തനിക്കെതിരെ വ്യാജവാര്‍ത്തകള്‍ ഉണ്ടാക്കി ദുഷ്പ്രചരണം നടത്തുന്നവര്‍ക്കെതിരേ നിയമനടപടി സ്വീകരിക്കുമെന്നും പി.ജി വിജയന്‍ വാര്‍ത്താസമ്മേളനത്തില്‍ അറിയിച്ചു.