വാടാനപ്പള്ളി: ഇരുളടഞ്ഞ സമൂഹത്തിന് സത്യത്തിന്റെ വഴികാട്ടിയായത് വിശുദ്ധ ഖുര്‍ആന്‍ ആണെന്ന് സമസ്ത കേരള ജംഇയ്യത്തുല്‍ ഉലമാ പ്രസിഡന്റ് ജിഫ്‌രി മുത്തുക്കോയ തങ്ങള്‍. തളിക്കുളം സെന്റര്‍ മസ്ജിദുല്‍ ഹിദായയില്‍ ആരംഭിക്കുന്ന ദാറുല്‍ മുജ്തബ ശംസുല്‍ ഉലമാ ഇസ്‌ലാമിക് അക്കാദമിയുടെ ഹിഫ്‌ളുല്‍ ഖുര്‍ആന്‍ കോളജ് ഉദ്ഘാടനവും പുതിയ കെട്ടിടത്തിന്റെ ശിലാസ്ഥാപനവും നിര്‍വഹിക്കുകയായിരുന്നു അദ്ദേഹം. തീവ്രവാദവും വര്‍ഗീയതയും ഇസ്‌ലാമിന് അന്യമാണെന്നും സമാധാനമാണ് ഇസ്‌ലാമിന്റെ സന്ദേശമെന്നും അദ്ദേഹം പറഞ്ഞു. അല്‍ ഹാഫിള് ശക്കീര്‍ ഹൈത്തമി മുഖ്യപ്രഭാഷണം നടത്തി. എം.കെ മുഹമ്മദ് ഹുസൈന്‍, മുഹമ്മദ് ഗസ്സാലി അഹ്‌സനി, സി.എ മുഹമ്മദ് റഷീദ്, ഹാറൂണ്‍ റാഷീഫ്, അബ്ദുല്‍ ഗഫൂര്‍, എ.സ് ബഷീര്‍, പി.എ അഹമ്മദ് ഹാജി, കെ.എം ഹബീബ് മാസ്റ്റര്‍, അബ്ദുല്‍ അസീസ് തളിക്കുളം സംസാരിച്ചു.