തരുവണ: കുന്നുമ്മലങ്ങാടിയില്‍ പുതുതായി നിര്‍മിച്ച ശംസുല്‍ ഉലമാ ഇസ്‌ലാമിക് സെന്ററിന്റെ ഉദ്ഘാടനവും സമസ്ത ആദര്‍ശ സമ്മേളനവും ഇന്ന് വൈകിട്ട് നാലിന് കുന്നുമ്മലങ്ങാടി കോട്ടുമല ടി.എം ബാപ്പു മുസ്്‌ലിയാര്‍ നഗറില്‍ നടക്കും. പാണക്കാട് ഹമീദലി ശിഹാബ് തങ്ങള്‍ ഉദ്ഘാടനം ചെയ്യും. കോഴിക്കോട് ഫാത്തിമ ഹോസ്പിറ്റല്‍ എം.ഡി ഡോ. അബ്ദുല്ല മുഹമ്മദ് അധ്യക്ഷനാകും. സമസ്ത സെക്രട്ടറി കൊയ്യോട് ഉമര്‍ മുസ്്‌ലിയാര്‍ അനുഗ്രഹ പ്രഭാഷണം നടത്തും. എസ്.വൈ.എസ് സംസ്ഥാന സെക്രട്ടറി അബ്ദുസമദ് പൂക്കോട്ടൂര്‍ മുഖ്യപ്രഭാഷണം നടത്തും. കുറ്റ്യാടി നിയോജക മണ്ഡലം എം.എല്‍.എ പാറക്കല്‍ അബ്ദുല്ല മുഖ്യാഥിതിയാകും. സമസ്ത കേന്ദ്ര മുശാവറ അംഗങ്ങളായ കെ.ടി ഹംസ മുസ്്‌ലിയാര്‍, മൂസക്കോയ മുസ്്‌ലിയാര്‍, സമസ്ത ലീഗല്‍ ചെയര്‍മാന്‍ പി.എ ജബ്ബാര്‍ ഹാജി, സി. മമ്മൂട്ടി എം.എല്‍.എ, പിണങ്ങോട് അബൂബക്കര്‍, ഇബ്‌റാഹിം ഫൈസി പേരാല്‍, ഹാരിസ് ബാഖവി കമ്പളക്കാട്, മമ്മൂട്ടി നിസാമി തരുവണ, ഷൗക്കത്തലി മൗലവി വെള്ളമുണ്ട എന്നിവര്‍ സംബന്ധിക്കും.