ചെന്നൈ: രാഷ്ട്രീയ പ്രവേശനത്തെക്കുറിച്ച ചര്‍ച്ചകള്‍ തുടരുന്നതിനിടെ കമല്‍ ഹാസനെ കാണാന്‍ ആം ആദ്മി പാര്‍ട്ടി നേതാവും ഡല്‍ഹി മുഖ്യമന്ത്രിയുമായ അരവിന്ദ് കെജ്‌രിവാള്‍ ഇന്ന് ചെന്നൈയിലെത്തും. രാവിലെ 11.30 നാണ് കെജ്‌രിവാള്‍ ചെന്നൈയിലെത്തുന്നത്.

സന്ദര്‍ശനത്തിന്റെ ഉദ്ദേശ്യം വ്യക്തമാക്കിയിട്ടില്ലെങ്കിലും രാഷ്ട്രീയ പ്രവേശനം തന്നെയാണ് അജണ്ടയെന്ന് എ.എ.പി വൃത്തങ്ങള്‍ അറിയിച്ചു. 2005ലും കമല്‍ ഹാസന്‍ കെജ്‌രിവാളുമായി കൂടിക്കാഴ്ച നടത്തിയിരുന്നു. ഡല്‍ഹിയില്‍ സിനിമാ ഷൂട്ടിങ്ങിനെത്തിയപ്പോഴായിരുന്നു അത്.  

രജനീകാന്ത് രാഷ്ട്രീയത്തിലിറങ്ങിയാല്‍ അദ്ദേഹവുമായി കൈ കോര്‍ത്ത് പ്രവര്‍ത്തിക്കുമെന്നും സ്വന്തം രാഷ്ട്രീയ പാര്‍ട്ടി രൂപീകരിക്കുന്നതിനെ കുറിച്ച് ആലോചനയുണ്ടെന്നും കമല്‍ ഹാസന്‍ നേരത്തെ വ്യക്തമാക്കിയിരുന്നു.

കേരള മുഖ്യമന്ത്രി പിണറായി വിജയനുമായും രാഷ്ട്രീയം ചര്‍ച്ച ചെയ്തതായി കൂടിക്കാഴ്ചയ്ക്ക് ശേഷം അദ്ദേഹം വ്യക്തമാക്കിയിരുന്നു. കാവിയല്ല തന്റെ നിറമെന്നും താരം പ്രഖ്യാപിച്ചിരുന്നു.