തിരുവനന്തപുരം: വായനയിലൂടെ പ്രതിരോധം വളര്‍ത്തിയെടുക്കാനാകണമെന്ന് വിദ്യാഭ്യാസമന്ത്രി പ്രൊഫ. സി. രവീന്ദ്രനാഥ് അഭിപ്രായപ്പെട്ടു. കേരള സ്‌റ്റേറ്റ് സെന്‍ട്രല്‍ ലൈബ്രറിയിലെ ആധുനികവല്‍കരണത്തിന്റെ ഭാഗമായുള്ള ഇലക്‌ട്രോണിക് ഡിസ്‌പ്ലേ ബോര്‍ഡ്, ഇ മെയില്‍, എസ്.എം.എസ് സംവിധാനങ്ങളുടെ ഉദ്ഘാടനം നിര്‍വഹിച്ചു സംസാരിക്കുകയായിരുന്നു മന്ത്രി. ദിശാബോധമുള്ള വായനയിലൂടെ പുസ്തകത്തിന്റെ ആഴത്തിലിറങ്ങിച്ചെന്ന് എഴുത്തുകാരന്റെ ഉദ്ദേശ്യം തിരിച്ചറിയാനാകണം.
നിഷ്‌ക്കളങ്കമായി വായിക്കുകയാണെങ്കില്‍ പുസ്തകം എഴുതിയയാളിന്റെ താല്‍പര്യം നമ്മുടേതായി മാറും. അതുകൊണ്ട് വായനക്ക് രാഷ്ട്രീയം ഉണ്ടായാലേ ആശയങ്ങള്‍ തിരിച്ചറിഞ്ഞ് ചെറുത്ത് നില്‍പ്പ് സാധ്യമാകൂവെന്നും അദ്ദേഹം ഓര്‍മിപ്പിച്ചു.
ചടങ്ങില്‍ സ്‌റ്റേറ്റ് ലൈബ്രേറിയന്‍ പി.കെ ശോഭന അധ്യക്ഷയായി.
ലൈബ്രറി ഉപദേശക സമിതിയംഗം ഡോ. ജോര്‍ജ് ഓണക്കൂര്‍, യൂനിവേഴ്‌സിറ്റി ലൈബ്രറി സയന്‍സ് വകുപ്പ് മുന്‍ മേധാവി ഡോ. ഹുമയൂണ്‍ കബീര്‍, ഡെപ്യൂട്ടി സ്‌റ്റേറ്റ് ലൈബ്രേറിയന്‍ എം.ബി ഗംഗാപ്രസാദ് തുടങ്ങിയവര്‍ സംബന്ധിച്ചു.
മൊബൈല്‍ എസ്.എം.എസിലൂടെയും ഇലക്ട്രോണിക് മെയിലുകളിലൂടെയും പുസ്തക വിതരണം, പുസ്തക റിസര്‍വേഷന്‍ വിവരങ്ങള്‍ തുടങ്ങിയവ അംഗങ്ങളെ അറിയിക്കുന്ന പുതിയ സേവനങ്ങളാണ് ആരംഭിച്ചത്.
ഇന്ത്യയിലാദ്യമായി ലൈബ്രറി പ്രോഗ്രാമുകള്‍ ഇലക്ട്രോണിക് ഡിസ്‌പ്ലേ ബോര്‍ഡ് വഴി പൊതുജനങ്ങളെ അറിയിക്കുന്നതും സ്റ്റേറ്റ് സെന്‍ട്രല്‍ ലൈബ്രറിയാണ്.