അഗര്‍ത്തല: ത്രിപുരയില്‍ മാധ്യമ പ്രവര്‍ത്തകന്‍ ശന്തനു ഭൗമിക് കൊല്ലപ്പെട്ടതുമായി ബന്ധപ്പെട്ട് നാലു ഇന്റിജിനേഴ്‌സ് പ്യൂപ്പുള്‍ ഫ്രണ്ട് ഓഫ് (ഐ.പി.എഫ്.ടി) പ്രവര്‍ത്തകര്‍ അറസ്റ്റില്‍. സംഘര്‍ഷം റിപ്പോര്‍ട്ട് ചെയ്യാനെത്തിയ ദന്‍രതിന്റെ റിപ്പോര്‍ട്ടര്‍ ഭൗമിക് പശ്ചിമ ത്രിപുരയില്‍ കൊല്ലപ്പെട്ടതുമായി ബന്ധപ്പെട്ടാണ് ഇവരെ പിടികൂടിയത്.
ഐ.പി.എഫ്.ടി നടത്തിയ സമരത്തിനിടെയുണ്ടായ സംഘര്‍ഷത്തില്‍ പിന്നില്‍ നിന്ന് തലക്കടിയേറ്റാണ് ഭൗമിക് കഴിഞ്ഞ ദിവസം കൊല്ലപ്പെട്ടത്. സംഭവത്തെ തുടര്‍ന്ന് മാധ്യമപ്രവര്‍ത്തകര്‍ മുഖ്യമന്ത്രിയുടെ വസതിക്ക് മുന്നില്‍ കഴിഞ്ഞ ദിവസം മണിക്കൂറുകളോളം പ്രതിഷേധ പ്രകടനം നടത്തിയിരുന്നു. ഭൗമിക്ക് കൊല്ലപ്പെട്ടതില്‍ സി.ബി.ഐ അന്വേഷണം നടത്തണമെന്ന് ത്രിപുര മധ്യപ്രവര്‍ത്തക കൂട്ടായ്മ ഇന്നലെ ആവശ്യപ്പെട്ടു.
സംഭവവുമായി ബന്ധപ്പെട്ട് സംസ്ഥാനത്തിന്റെ വിവിധയിടങ്ങളില്‍ പ്രതിഷേധങ്ങള്‍ നടന്നു. ജനങ്ങള്‍ തെറ്റായ വിവരങ്ങള്‍ പ്രചരിപ്പിക്കാതിരിക്കാന്‍ ഇന്റര്‍നെറ്റ് സേവനങ്ങള്‍ സര്‍ക്കാര്‍ കഴിഞ്ഞ ദിവസം റദ്ദാക്കി.
അതേസമയം വിവിധയിടങ്ങളില്‍ നടന്ന ആക്രമണങ്ങളില്‍ 16 പേര്‍ക്ക് പരുക്കേറ്റെന്നും രണ്ടുവാഹനങ്ങള്‍ തകരാറിലായെന്നും പശ്ചിമ ത്രിപുര പൊലിസ് സൂപ്രണ്ട് അവിജിത്ത് സപ്തര്‍ഷി പറഞ്ഞു.