നാദാപുരം: വിവാദ പരാമര്‍ശങ്ങളും ഉള്ളടക്കങ്ങളുമുണ്ടെന്ന ആരോപണത്തെ തുടര്‍ന്ന് പ്രസിദ്ധീകരണം മുടങ്ങിയ നാദാപുരം ഗവ. ആര്‍ട്‌സ് ആന്‍ഡ് സയന്‍സ് കോളജ് മാഗസിന്‍ സമവായത്തിലൂടെ പ്രസിദ്ധീകരിക്കാന്‍ ശ്രമം തുടങ്ങി. കോളജ് യൂനിയന്റെ ആഭിമുഖ്യത്തില്‍ പ്രസിദ്ധീകരിക്കാന്‍ തീരുമാനിച്ച ആദ്യ മാഗസിന് സ്റ്റാഫ് എഡിറ്ററും പ്രിന്‍സിപ്പലും അനുമതി നിഷേധിച്ചതോടെ വിദ്യാര്‍ഥികള്‍ പ്രതിഷേധവുമായി രംഗത്തിറങ്ങുകയായിരുന്നു.
മാഗസിന്‍ ഉള്ളടക്കങ്ങളില്‍ ചിലതു പ്രസിദ്ധീകരിക്കാന്‍ പറ്റാത്ത ഭാഗങ്ങളാണെന്നാണ് കോളജ് അധികൃതര്‍ പറയുന്നത്. അതേസമയം ഇത് ആവിഷ്‌കാര സ്വാതന്ത്ര്യത്തിനെതിരേയുള്ള കൈയേറ്റമാണെന്ന് വിദ്യാര്‍ഥികളും വാദിക്കുന്നു. ഇതിനിടെയാണ് മുസ്‌ലിം ലീഗ് നേതൃത്വം ഇടപെട്ട് സമവായത്തിലൂടെ പ്രസിദ്ധീകരിക്കാനുള്ള നീക്കങ്ങള്‍ ആരംഭിച്ചിരിക്കുന്നത്. കഴിഞ്ഞ ദിവസം നാദാപുരത്ത് ചേര്‍ന്ന ലീഗ് നേതൃയോഗം വിഷയം ചര്‍ച്ച ചെയ്തു. കോളജ് അധികൃതരുമായി പ്രശ്‌നം ചര്‍ച്ച ചെയ്തു ഇരുപക്ഷത്തിനും സ്വീകാര്യമായ ഫോര്‍മുല കണ്ടെത്താനാണ് നേതൃത്വം ശ്രമിക്കുന്നത്.
സമരത്തിന് മുന്‍പന്തിയില്‍ നില്‍ക്കുന്നത് പാര്‍ട്ടിയുടെ വിദ്യാര്‍ഥി പ്രസ്ഥാനമായതിനാല്‍ ഇവരെയും തൃപ്തിപ്പെടുത്തുന്ന തീരുമാനമെടുക്കാനുള്ള ഒരുക്കത്തിലാണ് നേതാക്കള്‍. കോളജില്‍ ഇപ്പോള്‍ നടക്കുന്ന സമരം എത്രത്തോളം മുന്നോട്ടു കൊണ്ടുപോകാന്‍ കഴിയുമെന്ന ആശങ്ക ഇപ്പോള്‍ സമരത്തിനു നേതൃത്വം കൊടുക്കുന്നവര്‍ക്കുണ്ട്.
വിഷയവുമായി ബന്ധപ്പെട്ട് സാമൂഹിക മാധ്യമങ്ങളില്‍ ചര്‍ച്ച നടക്കുന്നതല്ലാതെ രാഷ്ട്രീയ പാര്‍ട്ടികള്‍ ഏറ്റെടുക്കാന്‍ മടിക്കുകയാണ്. അതിനിടെ നിരവധി പേജുകള്‍ വെട്ടിമാറ്റിയിട്ടും പ്രസിദ്ധീകരണത്തെ എതിര്‍ക്കുന്ന സ്റ്റാഫ് എഡിറ്റര്‍ക്കെതിരേ സമരം ശക്തമാക്കണമെന്ന വാദം ഉയര്‍ത്തുന്നവരും നേതൃനിരയിലുണ്ട്.