മലപ്പുറം: സമസ്ത കേരള ജംഇയ്യത്തുല്‍ ഉലമ ജില്ലാ കമ്മിറ്റിയുടെ ആഭിമുഖ്യത്തില്‍ മഹല്ല് ഖാസി, മുദരിസ്, ഖത്വീബ് എന്നിവര്‍ക്കായി ആവിഷ്‌കരിച്ച ക്ഷേമനിധിയുടെ ഫണ്ട് ശേഖരണം ഇന്ന് പള്ളികളില്‍ നടക്കും. പെണ്‍കുട്ടികളുടെ വിവാഹം, വീട് നിര്‍മാണം, ചികിത്സ എന്നിവക്കായി വര്‍ഷങ്ങളോളമായി ക്ഷേമനിധിയിലൂടെ നിരവധി പേര്‍ക്ക് സഹായമെത്തിക്കാന്‍ സമസ്ത ജില്ലാകമ്മിറ്റിക്ക് സാധിച്ചിട്ടുണ്ട്.
ജുമുഅക്ക് ശേഷം നടക്കുന്ന ഫണ്ട് ശേഖരണം വിജയിപ്പിക്കാന്‍ മഹല്ല് ഭാരവാഹികളും ഖാസി, ഖത്വീബുമാരും രംഗത്തിറങ്ങണമെന്ന് ക്ഷേമനിധി ചെയര്‍മാന്‍ എം.ടി അബ്ദുല്ല മുസ്‌ലിയാരും കണ്‍വീനര്‍ കെ ആലിക്കുട്ടി മുസ്‌ലിയാരും സമസ്ത ജില്ലാ ജന. സെക്രട്ടറി പി. കുഞ്ഞാണി മുസ്‌ലിയാരും ആഹ്വാനം ചെയ്തു. പിരിച്ച സംഖ്യ സമസ്ത മണ്ഡലം സെക്രട്ടറിമാരെ ഏല്‍പ്പിക്കുകയോ മലപ്പുറം സുന്നി മഹലില്‍ നേരിട്ട് എത്തിക്കുകയോ ചെയ്യണമെന്ന് സമസ്ത ജില്ലാ ഓഫിസില്‍ നിന്നറിയിച്ചു.