കൊണ്ടോട്ടി: ഹെല്‍മറ്റ് ബോധവത്കരണവുമായി എംഎല്‍എയും വിദ്യാര്‍ഥികളും നിരത്തിലിറങ്ങി. കൊണ്ടോട്ടി  ഇ.എം.ഇ.എ കോളജ് എന്‍.എസ്.എസ് വിദ്യാര്‍ഥികളാണ് ടി.വി ഇബ്രാഹീം എംഎല്‍എക്കൊപ്പം ബൈക്ക് റാലി സംഘടിപ്പിച്ചത്. വിദ്യാര്‍ഥികള്‍ക്കും സമൂഹത്തിനും ഹെല്‍മറ്റ് ധരിക്കേണ്ടതിന്റെ ആവശ്യകത അറിയിച്ചു കൊണ്ടായിരുന്നു ബൈക്ക് യാത്ര. എം.എല്‍.എ ഫ്‌ളാഗ് ഓഫ് ചെയ്തു.
കോളജില്‍ നിന്നാരംഭിച്ച് കൊണ്ടോട്ടി ടൗണില്‍ അവസാനിപ്പിച്ചു. ഹെല്‍മറ്റ് ധരിച്ച് നൂറോളം വിദ്യാര്‍ഥികള്‍ എംഎല്‍എയോടൊന്നിച്ച് ബോധവത്കരണ റാലിയില്‍ പങ്കെടുത്തു. തുടര്‍ന്ന് കൊണ്ടോട്ടി ടൗണില്‍ ഹെല്‍മറ്റ് ധരിച്ചു വരുന്നവര്‍ക്കു മധുരവും ഹെല്‍മറ്റ് ധരിക്കാതെ വരുന്നവര്‍ക്ക് ബോധവത്കരണ ലഘുലേഖയും വിതരണം ചെയ്തു. കോളജില്‍ വരുന്ന എല്ലാ വിദ്യാര്‍ഥികളും ഇനി ഹെല്‍മറ്റ് കൊണ്ട് വരുമെന്നു പ്രതിജ്ഞയെടുത്തു. എന്‍.എസ്.എസ് ജില്ലാ കോഡിനേറ്റര്‍ കെ.ടി ഫിറോസ്, പ്രൊഫ. ജഹ്ഫര്‍ ഓടക്കല്‍, ഡോ. മുഹമ്മദ് ഹനീഫ റാസി, കെ.എം ഇസ്മായില്‍, മുബഷീര്‍, എന്‍.കെ നിഷാദ്, സാദിഖ്, മുഹമ്മദ് പരുത്തിക്കോട്, നേതൃത്വം നല്‍കി.