മനാമ: ബഹ്‌റൈനിലെ പ്രമുഖ കണ്‍സ്ട്രക്ഷന്‍ കമ്പനിയായ ജി.പി.സെഡിനെ തൊഴില്‍ മന്ത്രാലയം കരിമ്പട്ടികയില്‍പ്പെടുത്തി.
ഇനി ഒരറിയിപ്പുണ്ടാകുന്നതുവരെ ഈ കമ്പനിക്ക് പുതിയ തൊഴിലാളികളെ റിക്രൂട്ട് ചെയ്യാനാവില്ലെന്ന് തൊഴില്‍ മന്ത്രാലയം അണ്ടര്‍ സെക്രട്ടറി സബാഹ് അല്‍ ദോസരി വ്യക്തമാക്കി.
തൊഴിലാളികള്‍ക്ക് വേതനം നല്‍കുന്നതില്‍ വീഴ്ചവരുത്തിയതായി കണ്ടെത്തിയതിനെ തുടര്‍ന്നാണ് നടപടി.
ഇന്ത്യന്‍ പ്രവാസികളടക്കമുള്ള 500 ലേറെ പേര്‍ ഈ കമ്പനിയില്‍ ജോലി ചെയ്തുവരുന്നുണ്ട്. തുച്ഛമായ ശമ്പളത്തില്‍ ജോലി ചെയ്യുന്ന കണ്‍സ്ട്രക്ഷന്‍ തൊഴിലാളികള്‍ മുതല്‍ ഉയര്‍ന്ന തസ്തികയിലുള്ള എന്‍ജിനിയര്‍മാര്‍ വരെയുള്ളവര്‍ക്ക് മാസങ്ങളായി ശമ്പളം മുടങ്ങിക്കിടക്കുകയായിരുന്നു.
ഇതേത്തുടര്‍ന്ന് തൊഴിലാളികള്‍ തെരുവിലിറങ്ങുകയും ബഹ്‌റൈന്‍ തൊഴില്‍ മന്ത്രാലയത്തിലേക്ക് പ്രതിഷേധ പ്രകടനംനടത്തി പരാതി സമര്‍പ്പിക്കുകയും ചെയ്തിരുന്നു.
എന്നാല്‍, മുഴുവന്‍ തൊഴിലാളികള്‍ക്കും നല്‍കാനാവശ്യമായ പണം കമ്പനിയുടെ പക്കിലില്ലെന്നും വൈകാതെ പ്രശ്‌നപരിഹാരത്തിനുള്ള ശ്രമങ്ങള്‍ നടത്തുമെന്നും കമ്പനി അധികൃതര്‍ അറിയിച്ചു.