മക്ക: ഈ വര്‍ഷത്തെ ഉംറ സീസണ്‍ ആരംഭിച്ചതായി സഊദി ഹജ്ജ്, ഉംറ മന്ത്രാലയം വ്യക്തമാക്കി. പതിവിലും നേരത്തേയാണ് ഇത്തവണ ഉംറ തീര്‍ഥാടകരുടെ വരവ് തുടങ്ങിയത്. സാധാരണ ഹജ്ജ് തീര്‍ഥാടകരുടെ മടക്കയാത്രയ്ക്കുശേഷം മുഹറം പകുതിക്കുശേഷമാണ് ഉംറ തീര്‍ഥാടകരെ സ്വീകരിക്കാറുള്ളത്. എന്നാല്‍, സഊദി വിഷന്റെ ഭാഗമായി തീര്‍ഥാടകരുടെ എണ്ണം കൂട്ടുകയെന്ന ലക്ഷ്യത്തോടെയാണ് ഉംറ തീഥാടകരുടെ യാത്ര നേരത്തേയാക്കിയത്. ഈ വര്‍ഷം മുഹറം തുടക്കം മുതല്‍തന്നെ വിദേശ ഉംറ തീര്‍ഥാടകര്‍ എത്തുമെന്ന് അധികൃതര്‍ നേരത്തേ വ്യക്തമാക്കിയിരുന്നു. ഇതിനായി കഴിഞ്ഞ ഉംറ സീസണ്‍ അവസാനിച്ച ശവ്വാലില്‍ തന്നെ കൂടുതല്‍ തീര്‍ഥാടകരെ സ്വീകരിക്കാനുള്ള തയാറെടുപ്പുകള്‍ ആരംഭിച്ചിരുന്നു.
കഴിഞ്ഞ വര്‍ഷം 67 ലക്ഷം തീര്‍ഥാടകരാണ് ലോകത്തിന്റെ വിവിധ ഭാഗങ്ങളില്‍ നിന്നായി ഉംറക്കെത്തിയത്. ഇതിലും കൂടുതല്‍ തീര്‍ഥാടകര്‍ ഇത്തവണ എത്തുമെന്നാണ് അധികൃതര്‍ പ്രതീക്ഷിക്കുന്നത്. ലോകത്തിന്റെ വിവിധ ഭാഗങ്ങളില്‍ നിന്ന് ഉംറ തീര്‍ഥാടകരെ കൊണ്ടണ്ടുവരുന്നതിനായി നാലായിരത്തോളം ഏജന്‍സികളാണ് പ്രവര്‍ത്തിക്കുന്നത്. അതിനിടെ, ഹജ്ജിനെത്തിയ വിദേശ ഹാജിമാരില്‍ ഭൂരിഭാഗവും തിരിച്ചുപോയി. ശേഷിക്കുന്നവര്‍ ഏതാനും ദിവസങ്ങള്‍ക്കുള്ളില്‍ രാജ്യംവിടും. വിദേശ ഹാജിമാരില്‍ 12,83,954 പേര്‍ പുണ്യഭൂമിയില്‍ നിന്ന് മടങ്ങിയിട്ടുണ്ടണ്ട്.
അഞ്ചു ലക്ഷത്തോളം വിദേശ ഹാജിമാരാണ് ഇനി സ്വദേശങ്ങളിലേക്ക് യാത്ര തിരിക്കാനുള്ളത്. ഇന്ത്യന്‍ ഹാജിമാരില്‍ 63,000 പേര്‍ മാത്രമാണ് ഇനി അവശേഷിക്കുന്നത്. ഇതില്‍ 45,000ത്തോളം പേരും മദീനയിലാണ്.