പാലാ: സംസ്ഥാന സ്‌കൂള്‍ കായികോത്സവം ഒക്‌ടോബര്‍ 20 മുതല്‍ 23 വരെ പാലായില്‍ നടക്കുമെന്ന് കായിക മേളയുടെ ഓര്‍ഗനൈസിങ് കമ്മിറ്റി ചെയര്‍മാന്‍ കെ.എം. മാണി എം.എല്‍.എ. അറിയിച്ചു. നേരത്തെ ഒക്‌ടോബര്‍ 13 മുതല്‍ 16 വരെയായിരുന്നു മേള നടത്താന്‍ തീരുമാനിച്ചിരുന്നത്. ഇതോടൊപ്പം സ്‌കൂള്‍ കായികമേള നടത്തപ്പെടുന്ന പാലാ ഗ്രീന്‍ഫീല്‍ഡ് സിന്തറ്റിക് ട്രാക്ക് സ്റ്റേഡിയം മുഖ്യമന്ത്രി ഉദ്ഘാടനം ചെയ്യും. കായികമേള കമ്മിറ്റി ചെയര്‍മാന്‍മാരുടെയും കണ്‍വീനര്‍മാരുടെയും ജനപ്രതിനിധികളുടെയും സംയുക്ത യോഗം ഉദ്ഘാടനം ചെയ്യുകയായിരുന്നു അദ്ദേഹം. പാലാ നഗരത്തിലും പരിസര പ്രദേശങ്ങളിലുമായുള്ള 20 സ്‌കൂളുകളോട് അനുബന്ധിച്ച് താമസ സൗകര്യം ഏര്‍പ്പെടുത്തും. 19ന് കായിക താരങ്ങളുടെ രജിസ്‌ട്രേഷന്‍ ആരംഭിക്കും. ദീപശിഖ പൂഞ്ഞാര്‍ ജി.വി. രാജ സ്മാരകത്തില്‍ നിന്ന് 19ന് പ്രയാണമാരംഭിക്കും. ജോസ് കെ. മാണി എം.പി യോഗത്തില്‍ അധ്യക്ഷത വഹിച്ചു.