വേങ്ങര: പത്രികാസമര്‍പ്പണം പൂര്‍ത്തിയായതോടെ മുന്നണികള്‍ ഇനി പരസ്യപ്രചാരണത്തിലേക്ക്. യു.ഡി.എഫ്, എല്‍.ഡി.എഫ് മുന്നണികള്‍ മണ്ഡലം കണ്‍വന്‍ഷനുകള്‍ക്കു ശേഷം പഞ്ചായത്തുതല കണ്‍വന്‍ഷനുകളുടെ ഒന്നാംഘട്ടം പൂര്‍ത്തിയാക്കി. യു.ഡി.എഫ് ഇന്നലെ കണ്ണമംഗലം, ഒതുക്കുങ്ങല്‍, എ.ആര്‍ നഗര്‍ പഞ്ചായത്തുകളിലും എല്‍.ഡി.എഫ് ഊരകം, വേങ്ങര പഞ്ചായത്തുകളിലും കണ്‍വന്‍ഷന്‍ നടത്തി. എല്‍.ഡി.എഫ് കണ്ണമംഗലം, ഊരകം പഞ്ചായത്തുകളില്‍ ഇന്ന് കണ്‍വന്‍ഷന്‍ നടക്കും. മന്ത്രി എം.എം മണി, എം.എല്‍.എമാരായ ടി.വി രാജേഷ്, കെ രാജന്‍, ബിനോയ് വിശ്വന്‍, എ.പി അബ്ദുല്‍ വഹാബ് തുടങ്ങിയവര്‍ സംബന്ധിക്കും.
നാളെ നടക്കുന്ന ഒതുക്കുങ്ങല്‍, പറപ്പൂര്‍ പഞ്ചായത്തുകളുടെ കണ്‍വന്‍ഷനുകളില്‍ മന്ത്രി എ.സി മൊയ്തീന്‍, ജെയിംസ് മാത്യു എം.എല്‍.എ, സത്യം മൊകേരി, എം സ്വരാജ് എം.എല്‍.എ തുടങ്ങിയവര്‍ സംബന്ധിക്കും.
വേങ്ങര, ഊരകം പഞ്ചായത്തുകളില്‍ ഇന്നു നടക്കുന്ന യു.ഡി.എഫ് കണ്‍വന്‍ഷനുകളികളിലും നാളെ പറപ്പൂരില്‍ നടക്കുന്ന കണ്‍വന്‍ഷനിലും കെ.പി.സി.സി പ്രസിഡന്റ് എം.എം ഹസന്‍, പി.കെ കുഞ്ഞാലിക്കുട്ടി എം.പി, സാദിഖലി ശിഹാബ് തങ്ങള്‍, മുന്‍മന്ത്രി ഷിബു ബേബി ജോണ്‍, എ.പി അനില്‍ കുമാര്‍ എം.എല്‍.എ, അബ്ദുസമദ് സമദാനി തുടങ്ങിയവര്‍ സംബന്ധിക്കും.