ശ്രികണ്ഠപുരം: സംസ്ഥാനപാത നെടുമുണ്ടയില്‍ കാര്‍ തട്ടുകടയിലേക്ക് പാഞ്ഞുകയറി. രണ്ടുപേര്‍ക്ക് പരുക്ക്. മറ്റൊരു വാഹനത്തെ മറികടക്കുന്നതിനിടെ നിയന്ത്രണം വിട്ട കാര്‍ തട്ടുകടയുടെ മുന്‍പിലുള്ള ബൈക്കിടിച്ചു തകര്‍ത്തതിനു ശേഷം കടയിലേക്ക് പാഞ്ഞുകയറുകയായിരുന്നു.
അപകടത്തില്‍ കടയിലെ മേശയും കസേരകളും തൂണും തകര്‍ന്നു. കുണ്ടുലാട് സ്വദേശിയും ലോട്ടറി വില്‍പനക്കാരനുമായ കൃഷ്ണന്‍(60), നെടുമുണ്ടയിലെ കാര്‍പെന്റര്‍ തൊഴിലാളി ദാമോദരന്‍(48) എന്നിവര്‍ക്കാണ് പരുക്കേറ്റത്. നെടുമുണ്ട വളവിലെ പി.വി ചന്ദ്രന്റേതാണ് തട്ടുകട. ഇന്നലെ രാവിലെ ചെറുക്കളയില്‍ നിന്നു ശ്രീകണ്ഠപുരത്തേക്ക് വരികയായിരുന്ന ചൊര്‍ക്കള സ്വദേശി ഫത്താഹിന്റെ കാറാണ് അപകടത്തില്‍പെട്ടത്. ശബ്ദം കേട്ട് കടയിലുണ്ടായിരുന്നവര്‍ ഓടിരക്ഷപ്പെട്ടതിനാല്‍ വന്‍ദുരന്തമൊഴിവായി. ആരുടെയും പരുക്ക് ഗുരുതരമല്ല. പരുക്കേറ്റവരെ തളിപ്പറമ്പ് ആശുപത്രിയില്‍ പ്രവേശിപ്പിച്ചു.