തൃശൂര്‍: കൊച്ചിന്‍ ദേവസ്വം ബോര്‍ഡിനു കീഴിലെ ക്ഷേത്രങ്ങളില്‍ നടക്കുന്ന അഴിമതിയെ കുറിച്ച് ദേവസ്വം വിജിലന്‍സ് അന്വേഷണം തുടങ്ങി. കാണിക്കയായി ലഭിക്കുന്ന വിലപ്പെട്ട ആഭരണങ്ങള്‍ മുക്കിയതു മുതല്‍ വ്യാജ രശീതുകള്‍ വരെ പിടിച്ചെടുത്തതായാണ് വിവരം. കൊടുങ്ങല്ലൂര്‍ ശൃംഗപുരം ക്ഷേത്രത്തില്‍ സ്വര്‍ണ കിരീടമുള്‍പ്പെടെ ദേവസ്വം ജീവനക്കാരന്‍ അടിച്ചുമാറ്റിയതായി അനേവഷണ സംഘം കണ്ടെത്തിയിട്ടുണ്ട്.
കൊച്ചിന്‍ ദേവസ്വം ഭോര്‍ഡിനു കിഴിലെ 403 ക്ഷേത്രങ്ങളിലും വിജിലന്‍സ് പരിശോധന നടത്തുന്നുണ്ട്. ഏതാനും ക്ഷേത്രങ്ങളിലെ അഴിമതിയെ കുറിച്ച് ലഭിച്ച പരാതികളുടെ അടിസ്ഥാനത്തിലാണ് പരിശോധന. ഇതേ പരിശോധന ഭാഗമായാണ് തൃശൂര വടക്കുംനാഥ ക്ഷേത്രത്തിലെ രണ്ട് ഗുമസ്തന്‍മാര്‍ സസ്‌പെനഷനിലായത്.
അന്വേഷണം തുടങ്ങിയവയില്‍ ശൃംഗപുരം ക്ഷേത്രത്തിലാണ് ഏറ്റവും വലിയ അഴിമതി വിജിലന്‍സ് സംഘത്തിന്റെ ശ്രദ്ധയില്‍പ്പെട്ടത് എന്നാണറിയുന്നത്. കാണിക്കയായി ക്ഷേത്രത്തില്‍ നല്‍കിയ 16 ഗ്രാം തൂക്കമുള്ള സ്വര്‍ണ കിരീടം, വ്യാജ രശീത് ബുക്കുകള്‍ എന്നിവ ഈ ക്ഷേത്രത്തിന്റെ ജൂനിയര്‍ ദേവസ്വം ഓഫിസറുടെ വീട്ടില്‍ നിന്ന് കണ്ടെടുത്തതായും സൂചനയുണ്ട്. തൃശൂര്‍ ശങ്കരംകുളങ്ങര ക്ഷേത്രത്തില്‍ ഭരണസമിതിയുടെ സാമ്പത്തിക തട്ടിപ്പിനെ കുറിച്ച് ഉപേദേശകസമിതി നല്‍കിയ പരാതിയും എറണാകുളം പള്ളിയറക്കാവിലെ ഉപദേശകസമിതിക്കെതിരെയുള്ള പരാതിയും അന്വേഷിച്ചു വരികയാണ്. ക്ഷേത്രം നടത്തിപ്പ്, ഭൂമി കയ്യേറ്റം തുടങ്ങിയ പരാതികളാണ് ദേവസ്വം വിജിലന്‍സ് അന്വേഷിക്കുന്നത്.