ഗുഡ്ഗാവ്: റയാന്‍ ഇന്റര്‍നാഷണല്‍ സ്‌കൂളില്‍ രണ്ടാം ക്ലാസ് വിദ്യാര്‍ഥി കഴുത്തറുത്ത് കൊല്ലപ്പെട്ട സംഭവത്തെക്കുറിച്ചുള്ള അന്വേഷണത്തിനായി സി.ബി.ഐ സംഘം ഇന്നലെ സ്‌കൂളിലെത്തി. ഫോറന്‍സിക് സംഘം ഉള്‍പ്പെടെ 12 പേരാണ് സ്‌കൂളില്‍ തെളിവെടുപ്പിനായി എത്തിയിരുന്നത്. കഴിഞ്ഞ എട്ടാം തിയതിയാണ് ഏഴുവയസുകാരനായ പ്രദ്യുമന്‍ താക്കൂര്‍ സ്‌കൂളിലെ ശുചിമുറിയില്‍ കൊല്ലപ്പെട്ടത്. സംഭവത്തില്‍ സി.ബി.ഐ അന്വേഷണം ആവശ്യപ്പെട്ട രക്ഷിതാക്കള്‍ ഇതിന് തയാറായിട്ടില്ലെങ്കില്‍ സുപ്രിം കോടതിയെ സമീപിക്കുമെന്ന് അറിയിച്ചിരുന്നു. തുടര്‍ന്നാണ് അന്വേഷണം സി.ബി.ഐയെ ഏല്‍പ്പിച്ചത്.